Read nynorsk 1938 Esekiel 35 Bible Online

Esekiel 35 - nynorsk 1938 bible

Esekiel 35

¹Herrens ord kom til meg, og det lydde so:

²Menneskeson, vend andletet mot Se'irfjellet og spå mot det!

³Seg til det: So segjer Herren, Israels Gud: Sjå eg kjem yver deg, du Se'irfjell, og retter ut handi mot deg og gjer deg audt og øyde.

⁴Byane dine vil eg gjera til grushaugar, og du sjølv skal verta ei audn; og du skal sanna at eg er Herren.

⁵For di du ber på ein æveleg fiendskap og lét Israels-borni koma under sverds-egg - i deira usæletid, då den misgjerningi vart fullførd som førde til undergang,

⁶difor, so visst som eg lever, segjer Herren, Israels Gud, vil eg gjera det til blod, og blod skal søkja etter deg; for di du ikkje hev hata blod, skal blod søkja etter deg.

⁷Eg vil gjera Se'irfjellet audt og øyde og rydja ut or det alle som kjem og fer.

⁸Eg vil fylla fjelli der med drepne menner; på dine haugar og i dine dalar og i alle dine bekker skal det falla menner som er drepne med sverd.

⁹Til ævelege audner vil eg gjera deg, og byane dine skal aldri meir verta bustader; og de skal sanna at eg er Herren

¹⁰For di du sa: Båe folki og båe landi skal verta mine, og me vil taka dei til eiga, endå Herren hev vore der, /[71]

¹¹difor vil eg, so visst som eg lever, segjer Herren, Israels Gud, gjera med deg etter den vreide og ovund som du hev synt i ditt hat imot dei, og eg skal verta kjend hjå dei når eg dømer deg.

¹²Og du skal sanna at eg, Herren hev høyrt alle hædingsordi som du hev tala mot Israelsfjelli, då du sa: Dei er lagde i øyde, me hev lenge fenge dei til mat.

¹³De bruka munnen mot meg i ovmod og let falla mange ord imot meg; eg hev nok høyrt det.

¹⁴So segjer Herren, Israels Gud: Medan all jordi fagnar seg, vil eg leggja deg i øyde.

¹⁵Som du fagna deg av di arven åt Israels-lyden vart øydelagd, so vil eg gjera med deg; ei audn skal Se'irfjellet verta, og heile, heile Edom med, og dei skal sanna at eg er Herren.