Read nynorsk 1938 Esekiel 41 Bible Online

Esekiel 41 - nynorsk 1938 bible

Esekiel 41

¹So førde han meg til det Heilage, og han mælte stolpane: dei var seks alner breide på den eine sida og seks alner på hi - det var breiddi på tjeldet.

²Dørgapet var ti alner breidt, og sideveggene innmed døri var fem alner på kvar sida. So mælte han lengdi på det: fyrti alner, og breiddi: tjuge alner. /[80]

³So gjekk han inn i det inste romet og mælte dørstolpane: dei heldt tvo alner, og døri: ho heldt seks alner, og breiddi på døri: sju alner. /[81]

⁴Og han mælte lengdi på det: tjuge alner, og breiddi: tjuge alner, beint imot templet. So sa han til meg: Dette er det Høgheilage. /[82]

⁵So mælte han husveggen: han var seks alner, og breiddi på sidekovane: fire alner, rundt ikring heile huset.

⁶Sidekovane låg, kove attmed kove, i tri høgder, tretti i kvar høgd, og dei rakk innåt den muren som huset hadde mot sidekovane rundt ikring, so dei hadde studnad; men dei studde seg ikkje i sjølve husveggen.

⁷Og breiddi på sidekovane auka på rundt ikring, alt etter som ein kom høgre upp; for tilbygnaden kringum huset gjekk uppetter og uppetter rundt ikring huset. Difor auka breiddi inn mot huset ovantil, og frå nedste høgdi steig ein upp i den øvste gjenom den millomste.

⁸Og eg såg at huset låg på ein pall som nådde rundt ikring; grunnvollane åt sidekovane var ei full stong, seks alner til kanten.

⁹Tjukkleiken på utveggen åt sidekovane var fem alner, og romet millom sidekovane på huset

¹⁰og hine kovane var tjuge alner breidt rundt ikring heile huset.

¹¹Dørene til sidekovane vende ut imot dette opne romet, ei dør i nord og ei i sud; og det opne romet var fem alner breidt rundt ikring.

¹²Den bygnaden som låg innmed det fråskilde tunet på vestsida, var sytti alner breid, og veggen på bygnaden var fem alner tjukk rundt ikring og nitti alner lang.

¹³So mælte han huset: det var hundrad alner langt, og det fråskilde tunet og bygnaden med vegger var hundrad alner på lengd.

¹⁴Og framsida på huset og det fråskilde tunet mot aust var hundrad alner på breidd.

¹⁵So mælte han lengdi på den bygnaden som låg på baksida innmed det fråskilde tunet, og svalene på båe sidor åt bygnaden: det var hundrad alner; like eins det indre templet og hallene i fyregarden.

¹⁶Dørstokkane og vindaugo med faste grindar og svalene rundt ikring i deira tri høgder - ovanfor dørstokken var det eit tre-panel rundt ikring, og jordi nådde upp til vindaugo, og attfor vindaugo var det lemmar -

¹⁷og romet uppyver dørene og romet inn mot det indre huset og utetter og på heile veggen rundt ikring, innan og utan, alt var etter mål.

¹⁸Og det var gjort kjerubar og palmor, ei palma millom tvo kjerubar; kvar kjerub hadde tvo andlet,

¹⁹eit manns-andlet mot palma på den eine sida og eit ungløve-andlet mot palma på hi; so var gjort på heile huset rundt ikring.

²⁰Frå jordi til uppyver døri var det gjort kjerubar og palmor, på tempelveggen. /[83]

²¹Templet hadde firkanta dørskier, og framsida på heilagdomen såg like eins ut. /

²²Altaret var av tre, tri alner høgt og tvo alner langt, og det hadde hyrno sine, og langsida og veggene var av tre. Og han tala til meg og sa: Dette er bordet som stend framfor Herrens åsyn. /

²³Templet og heilagdomen hadde tvo dører.

²⁴I kvar av dei var det tvo dørvenger, som båe hadde gangjarn; kvar dør hadde tvo dørvenger.

²⁵Og på dei, på tempeldørene, var det gjort kjerubar og palmor like eins som på veggene. På framsida åt forhalli utantil var det ein tverrbjelke av tre.

²⁶Det var vindaugo med fast grind og palmor på sideveggene åt forhalli, på båe sidor, like eins på sidekovane i huset og på tverrbjelkane.