Read nynorsk 1938 Esekiel 42 Bible Online

Esekiel 42 - nynorsk 1938 bible

Esekiel 42

¹So førde han meg ut i den ytre fyregarden den vegen som gjekk nordetter, og sidan førde han meg til dei kovane som låg midt framfor det fråskilde tunet og beint imot bygnaden i nord,

²til langsida, som var på hundrad alner, med inngang i nord, men breiddi var femti alner.

³Ut imot det tjuge alner breide stykket av den indre fyregarden og ut imot steingolvet i den ytre fyregarden var det sval mot sval i tri høgder.

⁴Framanfor kovane var det ein ti alner breid gang innetter, ein veg på ei aln, og dørene deira snudde i nord.

⁵Dei øvste kovane var mindre enn hine; for svalene tok burt meir rom frå dei enn frå dei nedste og dei millomste i bygnaden;

⁶for dei låg i tri høgder, men hadde ikkje sulor, so som fyregardane hadde; difor vart det mindre rom i dei øvste kovane enn i dei nedste og millomste, frå jordi og uppetter.

⁷Ein mur som var utanfor, frammed kovane, imot den ytre fyregarden, gjekk framanfor kovane; han var femti alner lang.

⁸For lengdi på dei kovane som låg imot den ytre fyregarden, var femti alner, men mot templet hundrad alner.

⁹Nedunder desse kovane var inngangen frå aust, når ein gjekk inn i dei frå den ytre fyregarden.

¹⁰Der som fyregards-muren mot aust var på det breidaste, framanfor det fråskilde tunet og framanfor bygnaden, låg det og kovar,

¹¹og framanfor dei gjekk det ein veg; dei såg ut som dei kovane som låg mot nord; dei var like lange og like breide som dei, alle utgangar og tilskipnader elles hadde dei like eins som dei, og som dørene på dei,

¹²so var og dørene på dei kovane som låg mot sud; det var ei dør der som vegen tok til, vegen frammed den muren som høyrde til, vegen austetter, der ein gjekk inn til dei.

¹³So sa han til meg: Kovane mot nord og kovane mot sud, som ligg ut imot det fråskilde tunet, dei er heilage kovar, der prestane, som stig fram for Herren, skal eta det høgheilage; der skal dei leggja det høgheilage, både matofferet og syndofferet og skuldofferet; for det er ein heilag stad.

¹⁴Når prestane gjeng inn, skal dei ikkje ganga ut att or heilagdomen og ut i den ytre fyregarden, men der skal dei leggja av seg klædi som dei gjer tenesta i; for dei er heilage; dei skal taka på seg andre klæde, og so kann dei ganga dit der folket lyt vera. /[84]

¹⁵Då han hadde gjort mælingi frå seg i det indre huset, førde han meg ut gjenom den porten som hadde framsida mot aust; og der mælte han rundt ikring.

¹⁶Han mælte austsida med mælestongi: ho var fem hundrad stenger etter mælestongi rundt ikring.

¹⁷Han mælte nordsida: ho var fem hundrad stenger etter mælestongi rundt ikring.

¹⁸Sudsida og mælte han: ho var fem hundrad stenger etter mælestongi.

¹⁹So gjekk han ikring til vestsida og mælte fem hundrad stenger etter mælestongi.

²⁰På alle fire sidor mælte han det; det hadde ein mur rundt, fem hundrad stenger lang og fem hundrad breid, til å skilja det heilage frå det som ikkje var heilagt.