Read nynorsk 1938 Esekiel 46 Bible Online

Esekiel 46 - nynorsk 1938 bible

Esekiel 46

¹So segjer Herren, Israels Gud: Porten åt den indre fyregarden, den som snur i aust, skal vera stengd dei seks vyrkedagane, men på sabbatsdagen skal han vera open, og like eins på nymåne-dagen.

²Då skal fyrsten ganga inn gjenom port-forhalli utanfrå og stana attmed port-dørskii; prestane skal ofra brennofferet hans og takkofferi hans, og han skal tilbeda på port-dørstokken og sidan ganga ut att; men porten skal ikkje stengjast fyrr um kvelden.

³Og landslyden skal tilbeda på sabbatane og nymåne-dagane for Herrens åsyn attmed inngangen til den same porten.

⁴Brennofferet som fyrsten skal ofra til Herren på sabbatsdagen, skal vera seks lytelause lamb og ein lytelaus ver,

⁵og til matoffer ein efa attåt veren, men attåt lambi slikt matoffer som han sjølv vil gjeva, og ein hin olje attåt kvar efa.

⁶Og på nymåne-dagen ein lytelaus ungukse og seks lamb og ein ver; lytelause skal dei vera.

⁷Til matoffer skal han ofra ein efa attåt uksen og ein efa attåt veren, og attåt lambi so mykje som han hev råd til, og ein hin olje attåt kvar efa.

⁸Når fyrsten gjeng inn, skal han ganga gjenom port-forhalli, og same vegen skal han ganga ut att.

⁹Men når landslyden gjeng inn for Herrens åsyn på høgtidene, då skal den som gjeng inn igjenom nordporten og vil tilbeda, ganga ut att gjenom sudporten, og den som gjeng inn gjenom sudporten, ganga ut gjenom nordporten; han skal ikkje snu og ganga ut att gjenom same porten som han gjekk inn igjenom, men dei skal ganga ut beint fram.

¹⁰Fyrsten skal ganga inn saman med hine, når dei gjeng inn; og når dei gjeng ut, skal dei ganga ut saman.

¹¹I helgane og høgtidene skal matofferet vera ein efa attåt kvar ukse og ein efa attåt kvar ver, men attåt lambi so mykje som han sjølv vil gjeva, og ein hin olje attåt kvar efa.

¹²Når fyrsten vil ofra eit friviljugt offer - eit brennoffer eller takkoffer til friviljugt offer åt Herren, då skal dei lata upp åt han den porten som snur i aust, og han skal ofra brennofferet sitt og takkofferi sine like eins som han gjer på sabbatsdagen. So skal han ganga ut att, og når han er utgjengen, skal porten stengjast.

¹³Til brennoffer åt Herren skal du dagstødt ofra eit årsgamalt lytelaust lamb; kvar morgon skal du ofra det.

¹⁴Og til matoffer attåt skal du kvar morgon ofra setteparten av ein efa og tridjeparten av ein hin olje til å væta mjølet med; det er eit matoffer åt Herren - fyresegner som skal gjelda æveleg, for alle tider.

¹⁵Soleis skal dei ofra lambet og matofferet og oljen kvar morgon; det skal vera eit stendigt brennoffer.

¹⁶So segjer Herren, Israels Gud: Når fyrsten gjev einkvan av sønene sine ei gåva, so er det odelen hans; sønene hans skal hava det, dei fær det til odel og eiga.

¹⁷Men når han gjev einkvan av tenarane sine noko av odelen sin til gåva, so skal det vera hans til fridomsåret, men då skal fyrsten få det att; berre sønene hans skal eiga odelen hans.

¹⁸Fyrsten må ikkje taka odelsjord frå folket, so han driv dei burt frå eiga deira; av si eigi eiga skal han lata sønene sine erva, so ikkje folket mitt vert spreidt med di dei misser kvar si eiga.

¹⁹So førde han meg gjenom den inngangen som var attmed porten, til dei heilage kovane som var etla prestane, og som snudde i nord; og sjå, der var det eit rom lengst burte mot vest.

²⁰Og han sa til meg: Dette er den staden der prestane skal koka skuldofferet og syndofferet, og der dei skal baka matofferet, so dei ikkje skal turva bera det ut i den ytre fyregarden og på den måten helga folket.

²¹So let han meg ganga ut i den ytre fyregarden, og førde meg ikring til dei fire hyrno på fyregarden; og sjå, i kvart hyrna på fyregarden var det eit tun.

²²I dei fire hyrno på fyregarden var dei inngjerde, desse tuni; fyrti alner lange og tretti alner breide var dei; desse fire tuni i hyrno hadde same målet.

²³Det gjekk ein murgard rundt ikring inni dei, rundt ikring i alle fire, og det var gjort gruvor til å koka i nedantil med murgarden rundt ikring.

²⁴Og han sa til meg: Dette er kokehusi der tenarane i huset skal koka slaktofferi åt folket. /[90]