Read nynorsk 1938 Esekiel 47 Bible Online

Esekiel 47 - nynorsk 1938 bible

Esekiel 47

¹So førde han meg attende til inngangen åt huset, og sjå, det kom vatn ut under dørstokken på huset mot aust, for framsida på huset snudde i aust; og vatnet rann ned frå høgre sida på huset, sunnanfor altaret.

²Sidan let han meg ganga ut gjenom nordporten og førde meg ikring utanfor, til ytreporten, den porten som snur austetter, og sjå, det kom vatn vellande fram undan høgresida.

³Mannen gjekk no austetter med ei mælesnor i handi og mælte tusund alner; so hadde han meg til å vada yver vatnet, og vatnet gjekk meg til oklo.

⁴So mælte han tusund alner til og hadde meg til å vada yver vatnet; då gjekk det til knes. So mælte han tusund alner til og hadde meg til å vada yver vatnet; der gjekk det upp til lendene.

⁵So mælte han endå tusund alner, og no var det ei å som eg ikkje kunde vada; for vatnet gjekk so høgt at ein laut symja der - det var ei å som ikkje let seg vada.

⁶Og han sa til meg: Hev du set det, menneskeson? So førde han meg attende langs med å-breiddi.

⁷Som eg gjekk attende, fekk eg sjå at det stod ei stor mengd med tre på å-breiddi, på båe sidor.

⁸Og han sa til meg: Dette vatnet renn til austbygdene og sidan ned på Moane; so fell det ut i havet. Og når det vert styrt ut i havet, vert vatnet der friskt. /[91]

⁹Alle levande skapningar, som det yrer av alle stader der den tvifløymande åi renn, skal leva, og det skal verta ei ovmengd med fisk; for når dette vatnet kjem dit, vert det helsebot og liv alle stader der åi kjem. /[92]

¹⁰Det skal standa fiskarar frammed havet frå En-Gedi til En-Egla'im; ein stad til å kasta ut fiskegarn skal det vera; der skal finnast fisk av ymse slag i store mengder, som i Storhavet. /[93]

¹¹Men myrane og deplane der skal ikkje verta friske; dei skal berre vera til å vinna ut salt av.

¹²Frammed åi, på båe å-breddene, skal det veksa upp frukttre av alle slag; lauvet på dei skal ikkje visna og frukti ikkje trjota; kvar månad skal dei bera ny frukt; for vatnet åt dei renn ut frå heilagdomen; og frukti på dei skal vera til mat, og lauvet til lækjedom.

¹³So segjer Herren, Israels Gud: Dette er landskilet, og innan det skal de skifta ut landet til odel åt Israels tolv ætter; Josef skal hava tvo luter.

¹⁴De skal taka det til odel, den eine som den andre, for di eg hev rett handi i veret og svore at eg vilde gjeva federne dykkar det; so skal de då få dette landet til odel og eiga.

¹⁵Dette er då landskilet: På nordsida frå Storhavet langs med vegen til Hetlon burtimot Sedad,

¹⁶Hamat, Berota, Sibra'im, som ligg millom Damaskusskilet og Hamatskilet, det millomste Haser, som ligg burtimot Havranskilet.

¹⁷Soleis skal landskilet ganga frå havet til Hasar-Enon attmed Damaskusskilet og framleides endå lenger nordetter upp til Hamatskilet. Dette er nordsida.

¹⁸På austsida: Jordan, millom Havran og Damaskus og millom Gilead og Israelslandet; frå nordskilet til Austhavet skal de mæla. Dette er austsida.

¹⁹På sudsida - mot sud - skal landskilet ganga frå Tamar til Meribotvatnet attmed Kades; odelslandet skal nå til Storhavet. Dette er sudsida - landskilet mot sud.

²⁰På vestsida skal Storhavet vera landskil og ganga frå sudgrensa til midt for Hamat. Dette er vestsida.

²¹Dette landet skal de byta millom dykk etter Israels ætter.

²²De skal skifta det ut med lutkasting til odel åt dykk sjølve og dei framande som bur hjå dykk og hev fenge born ibland dykk; dei skal vera for dykk som dei som er fødde og borne i sjølve Israel; dei skal få odelsjord med dykk millom ættene i Israel.

²³I den ætti der den framande bur, der skal de gjeva han odelsjordi hans, segjer Herren, Israels Gud.