Read nynorsk 1938 Hosea 14 Bible Online

Hosea 14 - nynorsk 1938 bible

Hosea 14

¹Samaria skal bøta av di det hev vore trassigt mot sin Gud; for sverd skal dei falla, småborni deira skal verta krasa, og barnkonone deira skal ristast upp.

²Vend um, du Israel, til Herren din Gud! For med di misgjerning hev du ført deg i fall.

³Kom med [audmjuke] ord og vend um til Herren! Seg til han: Forlat all misgjerning og tak imot det gode me kann gjeva - lat oss betala med uksar, med lippone våre! /[34]

⁴Assur skal ikkje hjelpa oss, på hestar skal me ikkje rida, og me skal ikkje meir segja: Vår Gud! til det som hendene våre hev gjort. For det er hjå deg den farlause fær miskunn.

⁵Eg vil lækja deira fråfall, eg vil elska dei av hjarta; for vreiden min hev vendt seg ifrå dei.

⁶Eg skal vera som dogg for Israel; han skal bløma som ei lilja, og røta seg skal han som Libanonskogen.

⁷Renningane hans skal breida seg vidt utyver, det skal blenkja av lauvet som av oljetreet, og anga skal han som Libanon.

⁸Dei som bur i skuggen hans, skal atter avla korn og bløma som vintreet; minnet um han skal vera som vin ifrå Libanon.

⁹Efra'im! Kva skal eg med avgudar meir? Eg vil bønhøyra han og sjå til han; eg er som ein grøn cypress, det skal syna seg at di frukt kjem frå meg.

¹⁰Kven er so vis at han skynar dette, so vitug at han merkar seg det? For Herrens vegar er rette, og dei rettferdige ferdast på dei, men illgjerdsmenner snåvar der.