Read nynorsk 1938 Hosea 4 Bible Online

Hosea 4 - nynorsk 1938 bible

Hosea 4

¹Høyr Herrens ord, de Israels-born! For Herren hev sak med dei som bur i landet, av di det ingi sanning finst i landet og ingen kjærleik og ingen kjennskap til Gud.

²Dei sver og lyg, dei drep og stel og driv hor. Dei fer fram med vald, og mord fylgjer på mord.

³Difor skal landet visna, og alt som bur der, sjukna burt, både dyri på marki og fuglane i lufti; jamvel fiskane i havet skal setja til.

⁴Like vel må ingen skjemma på ein annan eller refsa han; for folket ditt er liksom dei som trettar med ein prest.

⁵Du skal stupa um dagen, og profeten skal stupa med deg um natti, og mor di skal eg tyna.

⁶Folket mitt gjeng til grunns av di det vantar kunnskap; etter di du hev vanda kunnskapen, vandar eg deg, so du ikkje skal vera prest for meg; du gløymde lovi åt din Gud, difor skal eg og gløyma borni dine.

⁷Di fleire dei vart, di meir synda dei mot meg; men deira heider skal eg snu um til vanheider.

⁸Mitt folks synd lever dei av, og deira misgjerning trår dei etter. /[11]

⁹Difor skal det ganga med presten som folket; eg skal heimsøkja han for hans åtferd og gjeva han lika for hans gjerningar.

¹⁰Dei skal eta og ikkje mettast, hora og ikkje meirast, av di dei hev slutta med å akta på Herren.

¹¹Horeliv og vin og druvesaft tek vitet burt.

¹²Folket mitt spør stokken sin til råds og hentar seg rettleiding av sin stav; for ei hordoms ånd hev forvilla dei, so dei med hor dreg seg burt frå sin Gud.

¹³Øvst uppå nutane ofrar dei, og på haugane brenner dei røykjelse under eik og poppel og terebinta, av di skuggen der er god; so vert døtterne dykkar skjøkjor og sonekonone dykkar horkonor.

¹⁴Eg vil ikkje refsa døtterne dykkar for skjøkjelivnaden deira eller sonekonone dykkar for deira hor; for mennene sjølve løyner seg burt med horkonor og ofrar med skjøkjor. Soleis gjeng det fåvituge folket til grunns.

¹⁵Um no du, Israel, vil halda på med ditt horeliv, so må då ikkje Juda føra skuld yver seg med sovore! Gakk ikkje til Gilgal og far ikkje upp til Bet-Aven og sver ikkje: So vist som Herren lever! /[12][13]

¹⁶For Israel er som ei balstyri ku; men no skal Herren lata dei beita som lamb på vidåtta.

¹⁷Efra'im er bunden til avgudsbilete; so fær han då fara!

¹⁸Rusen deira er slutt; hor hev skjoldane deira drive, høgt hev dei elska det som skamleg er. /[14]

¹⁹Ein storm grip dei med vengene sine, og dei skal verta til skammar med offeri sine. /[15]