Read nynorsk 1938 Hosea 7 Bible Online

Hosea 7 - nynorsk 1938 bible

Hosea 7

¹Når eg vil lækja Israel, då kjem misgjerningi åt Efra'im og vondskapen åt Samaria til synes; for dei fer med fals, og tjuvar bryt seg inn, og røvarflokkar ranar på vegane.

²Og dei tenkjer ikkje på at eg kjem i hug all vondskapen deira; no hev gjerningane deira ringa dei inne, dei er komne for mi åsyn.

³Med vondskapen sin gleder dei kongen, og hovdingane med lygnene sine.

⁴Alle i hop er dei horkarar; dei likjest ein omn som bakaren hetar upp; han held berre upp med eldingi frå di han knodar deigen til dess han er syrt.

⁵På dagen åt kongen vår drikk hovdingane seg sjuke på heit vin; sjølv tek han spottarar i handi.

⁶For dei gjer hjarta sitt heitt som ein omn medan dei lurer; heile natti søv bakaren deira, um morgonen brenn det som logande eld. /[19]

⁷Alle i hop vert dei heite som ein omn og brenner upp domarane sine; alle kongane deira er falne, det er ingen av dei som kallar på meg.

⁸Efra'im mengjer seg med folki; Efra'im hev vorte som ei kaka som ikkje er vend.

⁹Framande hev tært upp krafti hans, men han veit det ikkje; håret hans er alt gråsprengt, men han veit det ikkje.

¹⁰Israels byrgskap vitnar imot han beint uppi syni; men dei vender ikkje um til Herren sin Gud og søkjer han ikkje, trass i alt dette.

¹¹Men Efra'im hev vorte som ei godtrui duva, som ikkje hev vit; Egyptarland ropar dei på, til Assur fer dei.

¹²Best som dei fer av stad, breider eg netet mitt utyver dei og dreg dei ned, liksom ein gjer med fuglane i lufti; eg skal tukta dei, so som lyden deira alt hev høyrt.

¹³Usæle dei, at dei flydde ifrå meg! Øyding yver dei, for di dei hev svike meg! Eg vilde løysa dei ut, men dei for med lygn imot meg.

¹⁴Dei ropar ikkje til meg av hjarta, men ligg og jamrar seg på lægjet sitt; dei samlar seg av di dei vil hava korn og druvesaft, men meg vender dei seg ifrå.

¹⁵Det er eg som hev lært dei upp, og som hev styrkt armane deira; men mot meg tenkjer dei på vondt.

¹⁶Dei vender um, men ikkje uppetter; dei er som ein sviksam boge. Hovdingane deira skal falla for sverd for si hatige tunga skuld; for det vert dei hædde i Egyptarland.