Read nynorsk 1938 Hosea 9 Bible Online

Hosea 9 - nynorsk 1938 bible

Hosea 9

¹Gled deg ikkje, Israel, og fagna deg ikkje, liksom folki! For du hev gjenge frå din Gud i hor; du hev havt din hugnad i skjøkjeløn på kvar ein stad der dei treskjer korn.

²Treskjestaden og vinpersa skal ikkje kunna fø dei, og druvesafti skal mislukkast for dei.

³Dei skal ikkje få bu i Herrens land; Efra'im skal attende til Egyptarland, og i Assur skal dei eta det som ureint er.

⁴Dei skal ikkje hella ut vin til drykkoffer for Herren, og ikkje skal slaktofferi deira vera til hugnad for han; som syrgjebrød skal dei vera for dei; alle som et av det, skal verta ureine; for brødet sitt hev dei for seg sjølve, det kjem ikkje i Herrens hus.

⁵Kva skal de gjera på helgedagen, på Herrens høgtidsdag?

⁶For dei fer burt for øydingi skuld; Egyptarland skal samla dei, Memfis jorda dei; sylvet deira, det dyre, skal netlor eiga, klunger skal veksa i tjeldbuene deira.

⁷Komne er heimsøkjingsdagane, komne er attergjeldsdagane; det fær nok Israel merka: Ein dåre er profeten, vitlaus er åndsmannen, for di misgjerning er so stor og din fiendskap so sterk.

⁸Efra'im ser seg um etter andre gudar attåt min Gud; profeten er ei fuglefangarsnara på alle hans vegar, berre fiendskap i huset åt hans Gud.

⁹Djupt i used hev dei sokke, som i Gibea-dagane; han skal hugsa misgjerningi deira, han skal heimsøkja dei for syndene deira.

¹⁰Som druvor i øydemarki fann eg Israel, som den fyrste mogne frukti på eit fiketre når det tek til å bera, såg eg federne dykkar; men då dei kom til Ba'al-Peor, vigde dei seg til avgudsdyrkingi og vart ufysne liksom han som dei elska.

¹¹Herlegdomen åt Efra'im skal fljuga burt som ein fugl. Ingen skal få born meir, ingen vera med barn og ingen verta umhender.

¹²Ja, um dei èl upp borni sine, so skal eg gjera dei barnlause, so det ikkje finst menneske att; for usæle dei når eg gjeng ifrå dei!

¹³Efra'im er planta på ei eng - det er som eg såg burt til Tyrus; men Efra'im lyt føra borni sine ut til rettarmannen.

¹⁴Gjev dei, Herre! - Ja, kva skal du gjeva dei? Gjev dei morsliv som føder i utid, og brjost som tornar.

¹⁵All deira vondskap er samla i Gilgal, ja, der fekk eg hat til dei; for deira vonde åtferd skuld vil eg driva dei ut or mitt hus; eg vil ikkje elska dei lenger, alle deira førarar er upprørarar.

¹⁶Makk-eten er Efra'im, roti deira er turka, frukt skal dei ikkje bera; og um dei fær born, drep eg den dyre livsfrukti deira.

¹⁷Min Gud skal støyta dei burt, av di dei ikkje hev høyrt på han, og dei skal flakka heimlause ikring millom folki.