Read nynorsk 1938 Joel 3 Bible Online

Joel 3 - nynorsk 1938 bible

Joel 3

¹Og sidan skal det henda at eg vil renna ut min Ande yver alt kjøt, og dykkar søner og døtter skal tala profetord; dei gamle hjå dykk skal hava draumar, ungdomen dykkar skal sjå syner;

²jamvel yver trælane og trælekvendi vil eg renna ut min Ande i dei dagane.

³Teikn let eg te seg på himmel og på jord: blod og eld og røykkvervlar.

⁴Soli skal verta til myrker, og månen til blod, fyrr han kjem, Herrens dag, den store og skræmelege.

⁵Men kvar ein som kallar på Herrens namn, skal verta frelst; for på Sions fjell og i Jerusalem skal finnast ein flokk av undankomne, so som Herren hev sagt, og til den utfria flokken høyrer dei som Herren kallar.

⁶For sjå, i dei dagane og det belet, når eg gjer ende på fangetidi for Juda og Jerusalem,

⁷då vil eg samla alle heidningfolk og føra dei ned i Josafatsdalen, og der vil eg halda dom yver dei for Israel skuld, mitt folk og min odel, av di dei spreidde dei millom heidningane og skifte mitt land; /[4]

⁸um mitt folk kasta dei lut, dei gav ein gut for ei skjøkja, ei gjenta selde dei for vin, og den drakk dei upp.

⁹Og de, Tyrus og Sidon, og alle Filistarlands bygder, kva er det de vil meg? Er det noko de vil gjeva meg lika for, eller vil de gjera meg eitkvart? Snøgt og brått let eg det de hev gjort, koma att på dykkar eige hovud.

¹⁰De som tok sylvet og gullet mitt og førde mine dyraste skattar til templi dykkar,

¹¹og Judas og Jerusalems born selde de til Javans-borni, so de skulde få dei langt burt frå sitt land.

¹²Sjå, eg ropar dei fram att frå den staden de selde dei til, og let det de hev gjort, koma att på dykkar eige hovud.

¹³Eg skal selja dykkar søner og døtter til Juda-borni, og dei skal selja dei til sabearane, eit folk som bur langt undan; for Herren hev tala.

¹⁴Ropa dette ut millom heidningfolki, bu dykk til ein heilag krig, ropa på kjempone, lat alle hermenner koma og draga ut!

¹⁵Smid hakkone um til sverd og hageknivane til spjot! Veiklingen segje: Eg er ei kjempa.

¹⁶Skunda dykk og kom, alle de heidningfolk rundt ikring, og samle dykk i hop! Dit late du, Herre, dine kjempor stiga ned! /[5]

¹⁷Heidningfolki skal vakna og fara til Josafatsdalen; for der vil eg sitja til doms yver folki rundt ikring.

¹⁸Send sigden ut, for grøda er mogi! Kom og trakka, for persa er full, persekjeri fløymer med saft, vondskapen deira er stor.

¹⁹Flokk på flokk samlar seg i domsdalen. For nær er Herrens dag i domsdalen.

²⁰Sol og måne svartnar, og stjernone løyner sin glans.

²¹Herren skal bura frå Sion og lata røysti si ljoma frå Jerusalem, og himmel og jord skal bivra; men Herren er ei livd for sitt folk og ei vern for Israels-borni. /[6]

²²Og de skal sanna at eg er Herren dykkar Gud, som bur på Sion, mitt heilage fjell; Jerusalem skal vera ein heilag stad, og framande skal aldri meir trengja seg inn der.

²³Det skal verta so på den dagen at det dryp med druvesaft på fjelli og renn yver med mjølk på haugane, og alle bekker i Juda fløymer med vatn; ei kjelda vell fram frå Herrens hus og vatnar Sittimsdalen.

²⁴Egyptarland skal verta ei audn og Edom ei øydemark for valdsverki deira mot Juda-borni, for di dei hev rent ut skuldlaust blod i landet sitt.

²⁵Men Juda skal sitja æveleg trygt, og Jerusalem frå ætt til ætt.

²⁶Og eg vil hemna deira blod, det som eg ikkje fyrr hev hemnt. Og Herren bur på Sion.