Read nynorsk 1938 Amos 4 Bible Online

Amos 4 - nynorsk 1938 bible

Amos 4

¹Høyr dette ordet, de Basans kyr på Samariafjellet, de som trælkar dei små og er harde mot fatigfolk, de som segjer til mennene dykkar: Kom med vin, so me fær drikka!

²Herren, Israels Gud, hev svore ved sin heilagdom: Sjå, dagar skal koma yver dykk då dei dreg dykk av stad med hakar, og dei siste av dykk med fiskekrokar,

³og ut gjenom murbroti skal de fara, kvar og ei si eigi leid, og burtslengde skal de verta i slottet, segjer Herren. /[3]

⁴Gakk til Betel og synda, til Gilgal og synda til gagns, ber fram slaktofferet dykkar kvar morgon, dykkar tiender tridje kvar dag,

⁵brenn til takkoffer brød som er syrt, lys ut godvilje-offer, gjer det kjent! For slikt er det de likar, de Israels-born, segjer Herren, Israels Gud.

⁶Og eg lét dykk då ganga med munnen tom i kvar ein av byane dykkar, eg lét dykk vera forutan brød i kvar ein av heimane dykkar; men de vende ikkje um til meg, segjer Herren.

⁷Det var eg som heldt regnet att for dykk tri månader fyre skurden; ein by let eg det regna yver, ein annan fekk ingen ting; ein åker fekk regn, ein annan vart brend, av di regnet ikkje kom der;

⁸og tvo, tri byar sjangla av stad til same by, vilde få seg vatn, men dei fekk ikkje sløkkja torsten; men de vende ikkje um til meg, segjer Herren.

⁹Eg søkte dykk med moldaks og rust; grashoppen åt upp dykkar mange hagar og vingardar og fiketre og oljetre; men de vende ikkje um til meg, segjer Herren.

¹⁰Eg sende sotti på dykk som ein gong i Egyptarland, eg drap dykkar sveinar med sverd og let hestane verta til herfang, og illteven frå dykkar falne her let eg dykk få upp i nosi; men de vende ikkje um til meg, segjer Herren.

¹¹Eg støytte ned byar ibland dykk, som då Gud støytte ned Sodoma og Gomorra, og de vart som ein brand dei hev berga or elden; men de vende ikkje um til meg, segjer Herren.

¹²Difor vil eg fara åt med deg, Israel, so som eg hev sagt. Og sidan eg vil fara so åt med deg, so bu deg til å møta din Gud, Israel!

¹³For sjå, han som lagar fjelli og skaper vinden, og som kunngjer ein mann hans tankar, han som gjer morgonroden til myrker og skrid fram yver høgdene på jordi - Herren, allhers Gud, er namnet hans.