Read nynorsk 1938 Obadja 1 Bible Online

Obadja 1 - nynorsk 1938 bible

Obadja 1

¹Syni åt Obadias. So segjer Herren, Israels Gud, um Edom: Ei tidend hev me høyrt frå Herren, og bod er bore ut millom heidningfolki: Upp! Lat oss reisa oss til strid imot det!

²Sjå, liten vil eg gjera deg millom folki; ovleg vanvyrd skal du verta.

³Ditt hjartans ovmod hev dåra deg, du som bur i bergrivor, i din høge heim, du som segjer i ditt hjarta: Kven kann støypa meg ned?

⁴Um du enn byggjer høgt som ørnen, og reiret ditt ligg millom stjernor, skal eg støypa deg ned derifrå, segjer Herren.

⁵Um tjuvar kom til deg eller ransmenn um natti - å, kor du vert reint til inkjes! - tru dei då vilde stela meir enn det dei trong? Um det kom til deg folk som vilde hausta din vin, so leivde dei vel til ei ettersanking.

⁶Men å, kor dei ransakar Esau, og leitar upp hans løynde skattar!

⁷Radt til landskilet fylgjer dei deg alle dine sambandsbrør; dei svik deg og vinn på deg dine gode vener; dei menner som et ditt brød, legg ei snara for deg. Det finst ikkje vit i han!

⁸Skal eg ikkje den dagen, segjer Herren, øyda ut alle vise or Edom og alt vit frå Esaus fjell?

⁹Kjempone dine vert modlause, Teman, so kvar mann vert drepen og utrudd frå Esaus fjell.

¹⁰For valdsverki dine mot Jakob, bror din, skal du sveipast i skam, og utrudd skal du verta til æveleg tid.

¹¹Den dagen då du heldt deg undan, den dagen då framande rana hans gods, og utlendingar kom i hans portar og kasta lut um Jerusalem, då var du og som ein av dei.

¹²Sjå ikkje med hugnad på bror din's dag, på hans motgangsdag, og gled deg ikkje yver Juda-borni på øydingsdagen, og lat ikkje munnen so vidt upp på trengsle-dagen.

¹³Drag ikkje inn igjenom mitt folks port på uferdsdagen, sjå ikkje du og med lyst på deira naud på uferdsdagen, og rett ikkje handi etter deira gods på uferdsdagen!

¹⁴Og statt ikkje ved vegemotet til å rydja ut dei av mitt folk som hev kome seg undan, og gjev ikkje dei som hev rømt, i fiendevald på trengsle-dagen!

¹⁵For nær er Herrens dag yver alle folki; som du hev gjort, skal det gjerast med deg, di åtferd kjem att på ditt eige hovud.

¹⁶For som de hev drukke på mitt heilage fjell, skal alle folki drikka stødt; dei skal drikka og slurka og verta som aldri dei vore til.

¹⁷Men på Sions fjell skal finnast ein flokk av undankomne, og det skal vera ein heilag stad; og Jakobs hus skal få att si odelseiga.

¹⁸Og Jakobs hus skal verta eld, og Josefs hus ein loge, og Esaus hus skal verta halm; so kveikjer dei på og øyder det, og ingen vert att av Esaus hus, for Herren hev tala.

¹⁹Og sudlands-folket skal taka Esaufjellet, og låglands-folket Filistarlandet, og dei skal taka Efra'ims land og Samarialandet, og Benjamin skal taka Gilead;

²⁰og dei burtførte av denne Israels-heren skal taka det som finst av kana'anitar alt til Sarepta, og dei burtførde frå Jerusalem som er i Sefarad, skal taka sudlandsbyane i eiga.

²¹Og frelsarar skal draga upp på Sionfjellet og døma Esaufjellet, og riket skal høyra Herren til.