Read nynorsk 1938 Fjerde Mosebok 1 Bible Online

Fjerde Mosebok 1 - nynorsk 1938 bible

Fjerde Mosebok 1

¹So var det den fyrste dagen i den andre månaden året etter dei hadde fare frå Egyptarlandet, då tala Herren til Moses i Sinaiøydemarki, i møtetjeldet, og sa:

²De skal taka tal på heile Israels-lyden etter ætter og ættgreiner og skriva upp namni deira - alle karar, ein for ein,

³frå tjugeårsalderen og uppetter; alle våpnføre menner i Israel skal de mynstra, flokk for flokk, du og Aron.

⁴Og med dykk skal det vera ein mann av kvar ætt, den som er hovdingen for alle greinene i ætti.

⁵So heiter dei mennene som skal vera dykk til hjelp: av Rubens-ætti: Elisur, son åt Sede'ur;

⁶av Simeons-ætti: Selumiel, son åt Surisaddai;

⁷av Juda-ætti: Nahson, son åt Amminadab;

⁸av Issakars-ætti: Netanel, son åt Suar;

⁹av Sebulons-ætti; Eliab, son åt Helon;

¹⁰av Josefs-sønene: Elisama, son åt Ammihud, av Efra'ims-ætti, og Gamliel, son åt Pedasur, av Manasse-ætti,

¹¹av Benjamins-ætti: Abidan, son åt Gideoni;

¹²av Dans-ætti: Akieser, son åt Ammisaddai;

¹³av Asers-ætti: Pagiel, son åt Okran;

¹⁴av Gads-ætti: Eljasaf, son åt De'uel;

¹⁵av Naftali-ætti: Akira, son åt Enan.

¹⁶Dette var dei som var kalla til formenner for lyden, dei høgste i fedreættene sine, hovdingane yver Israels-ættene.

¹⁷So henta Moses og Aron dei mennene som var namngjevne,

¹⁸og fyrste dagen i andre månaden kalla dei lyden i hop til eit ålmannamøte; og alle som var yver tjuge år, vart innskrivne i manntalet med namn, ein for ein, etter ætter og ættegreiner,

¹⁹soleis som Herren hadde sagt; og Moses mynstra dei i Sinaiøydemarki.

²⁰Fyrst mynstra han dei som var frå sønene hans Ruben, eldste son åt Israel - og då alle våpnføre menner av Rubens-folket, frå tjugeårsalderen og uppetter, var innskrivne i manntalet, ein for ein, etter ætter og ættegreiner,

²¹so var det seks og fyrti tusund og fem hundrad mann.

²²So mynstra han dei som var ætta frå Simeons-sønene, og då alle våpnføre menner av Simeons-folket, frå tjugeårsalderen og uppetter, var innskrivne i manntalet, ein for ein, etter ætter og ættegreiner,

²³so var det ni og femti tusund og tri hundrad mann.

²⁴So mynstra han dei som var ætta frå Gads-sønene, og då alle dei våpnføre av Gads-folket, frå tjugeårsalderen og uppetter, var innskrivne i manntalet, ein for ein, etter ætter og ættegreiner,

²⁵so var det fem og fyrti tusund og seks hundrad og femti mann.

²⁶So mynstra han dei som var ætta frå Juda-sønene, og då alle dei våpnføre av Juda-folket, frå tjugeårsalderen og uppetter, var innskrivne i manntalet, ein for ein, etter ætter og ættegreiner,

²⁷so var det fire og sytti tusund og seks hundrad mann.

²⁸So mynstra han dei som var ætta frå Issakars-sønene, og då alle dei våpnføre av Issakars-folket, frå tjugeårsalderen og uppetter, var innskrivne i manntalet, ein for ein, etter ætter og ættegreiner,

²⁹so var det fire og femti tusund og fire hundrad mann.

³⁰So mynstra han dei som var ætta frå Sebulons-sønene, og då alle dei våpnføre av Sebulons-folket, frå tjugeårsalderen og uppetter, var innskrivne i manntalet, ein for ein, etter ætter og ættegreiner,

³¹so var det sju og femti tusund og fire hundrad mann.

³²So mynstra han dei som var ætta frå Josefs-sønene: Då alle dei våpnføre av Efra'ims-folket, frå tjugeårsalderen og uppetter, var innskrivne i manntalet, ein for ein, etter ætter og ættegreiner,

³³so var det fyrti tusund og fem hundrad mann;

³⁴og då alle dei våpnføre av Manasse-folket, frå tjugeårsalderen og uppetter, var innskrivne i manntalet, ein for ein, etter ætter og ættegreiner,

³⁵so var det tvo og tretti tusund og tvo hundrad mann.

³⁶So mynstra han dei som var ætta frå Benjamins-sønene, og då alle dei våpnføre av Benjamins-folket, frå tjugeårsalderen og uppetter, var innskrivne i manntalet, ein for ein, etter ætter og ættgreiner,

³⁷so var det fem og tretti tusund og fire hundrad mann.

³⁸So mynstra han dei som var ætta frå Dans-sønene, og då alle dei våpnføre av Dans-folket, frå tjugeårsalderen og uppetter, var innskrivne i manntalet, ein for ein, etter ætter og ættegreiner,

³⁹so var det tvo og seksti tusund og sju hundrad mann.

⁴⁰So mynstra han dei som var ætta frå Asers-sønene, og då alle dei våpnføre av Asers-folket, frå tjugeårsalderen og uppetter, var innskrivne i manntalet, ein for ein, etter ætter og ættegreiner,

⁴¹so var det ein og fyrti tusund og fem hundrad mann.

⁴²So mynstra han dei som var ætta frå Naftali-sønene, og då alle dei våpnføre av Naftali-folket, frå tjugeårsalderen og uppetter, var innskrivne i manntalet, ein for ein, etter ætter og ættegreiner,

⁴³so var det tri og femti tusund og fire hundrad mann.

⁴⁴Dette var dei som vart mynstra, dei som Moses og Aron og Israels hovdingar mynstra; og hovdingane var tolv i talet, ein for kvar ætt.

⁴⁵Og talet på dei av Israels-borni som vart mynstra etter ættgreinene sine, alle dei våpnføre av Israel, frå tjugeårsalderen og uppetter,

⁴⁶var seks hundrad og tri tusund og fem hundrad og femti; so mange var det som vart mynstra,

⁴⁷Levitane etter si fedreætt vart ikkje mynstra i hop med dei hine Israels-borni.

⁴⁸For Herren tala til Moses og sa:

⁴⁹Levi-ætti skal du ikkje mynstra eller taka tal på saman med hine Israels-borni.

⁵⁰Set levitane til å stella med tabernaklet som vitnemålet er gøymt i, og med all bunaden i det og alt som høyrer til. Dei skal bera tabernaklet og all bunaden, og dei skal taka vare på tabernaklet og lægra seg rundt ikring det.

⁵¹Når tabernaklet skal flytjast, so skal levitane taka det ned, og når det skal reisast, skal levitane setja det upp; kjem nokon framand innåt, lyt han døy. /[1]

⁵²Israels-borni skal lægra seg i flokk, kvar i sitt eige læger og innmed si fana;

⁵³men levitane skal lægra seg kringum vitnemåls-tabernaklet, so det ikkje skal koma vreide yver Israels-lyden; for det er levitane som lyt gjera det som skal gjerast med vitnemåls-tabernaklet.

⁵⁴Og Israels-borni gjorde so; dei gjorde i alle måtar som Herren hadde sagt Moses fyre.