Read nynorsk 1938 Fjerde Mosebok 19 Bible Online

Fjerde Mosebok 19 - nynorsk 1938 bible

Fjerde Mosebok 19

¹Og Herren tala til Moses og Aron og sa:

²Høyr no eit lovbod som Herren hev gjeve! Han sa: Seg til Israels-borni at dei skal koma til deg med ei raud kviga som ikkje hev lyte eller veila og aldri hev vore under åket.

³Den skal de gjeva til Eleasar, presten, og han skal leida henne utanfor lægret, og dei skal slakta henne for augo hans.

⁴Og Eleasar, presten, skal taka noko av blodet hennar på fingeren og skvetta sju gonger burt imot framsida av møtetjeldet.

⁵So skal dei brenna kviga for augo hans; både hudi og kjøtet og blodet, og møki med skal dei brenna.

⁶Og presten skal taka sedertre og isop og karmosinraud ull og kasta på elden som kviga brenn i.

⁷Sidan skal han två klædi sine og lauga lekamen sin i vatn, so kann han koma inn i lægret; men han skal vera urein alt til kvelds.

⁸Den som brende kviga, skal og två klædi sine og lauga lekamen sin i vatn og vera urein til kvelds.

⁹Og ein mann som er rein, skal samla i hop oska av kviga og leggja henne på ein rein stad utanfor lægret, so ho kann gøymast åt Israels-lyden til reinsingsvatn; det er eit syndoffer.

¹⁰Men den som samla oska av kviga, lyt två klædi sine og vera urein til kvelds. Og dette skal vera ei æveleg lov både for Israels-borni og dei framande som bur millom dei.

¹¹Den som kjem nær ein avliden, eit mannelik, skal vera urein sju dagar.

¹²Den tridje og den sjuande dagen skal han reinsa seg for synd med vatn; so vert han rein att; men reinsar han seg ikkje den tridje og den sjuande dagen, so vert han ikkje rein. /[15]

¹³Kven som kjem nær ein avliden, eit mannelik, og ikkje reinsar seg, han gjer Herrens tabernakel ureint og skal rydjast ut or Israel; av di det ikkje er skvett skiringsvatn på han, er han urein, det fylgjer ureinska med han.

¹⁴So lyder lovi: Når ein døyr i eit tjeld, so skal alle som kjem inn i tjeldet, og alt som er i tjeldet, vera ureint i sju dagar.

¹⁵Og alle opne koppar, alle som det ikkje er lok på eller bundne yver, vert ureine.

¹⁶Og den som ute på marki kjem nær ein som er drepen med sverd, eller eit anna lik eller mannebein eller ei grav, skal vera urein i sju dagar.

¹⁷Når dei vil reinsa ein som soleis er vorte urein, so skal dei taka noko av oska etter det uppbrende syndofferet og ausa rennande vatn på i eit fat.

¹⁸Og ein mann som er rein, skal taka isop og duppa i vatnet og skvetta på huset og på alle dei ting og alle dei folk som var der, og på den som hev kome nær mannebein eller ein mann som er ihelslegen, eller eit anna lik eller ei grav.

¹⁹Den tridje og den sjuande dagen skal dei reine skvetta på den som hev vorte urein; og når reinsingi er fullførd den sjuande dagen, skal han två klædi sine og lauga seg i vatn, og vert då rein att same kvelden.

²⁰Men den som vert urein og ikkje reinsar seg, han skal rydjast ut or lyden, for di han hev gjort Herrens heilagdom urein - det hev ikkje kome reinsingsvatn på han; han er urein.

²¹Dette skal vera ei æveleg lov for dei. Den som skvettar reinsingsvatnet, skal tvo klædi sine, og den som kjem nær reinsingsvatnet, skal vera urein alt til kvelds.

²²Alt det den ureine kjem nær, vert ureint, og den som kjem innåt han, skal vera urein til kvelds.