Read nynorsk 1938 Fjerde Mosebok 21 Bible Online

Fjerde Mosebok 21 - nynorsk 1938 bible

Fjerde Mosebok 21

¹Då den kana'anitiske kongen i Arad, som budde i sudlandet, høyrde at Israel kom farande etter Atarimvegen, tok han på dei og fanga nokre av dei og drog av med dei.

²Då gjorde Israel ein lovnad til Herren og sa: Gjev du dette folket i mi hand, so skal eg bannstøyta byane deira.

³Og Herren høyrde bøni og gav kana'anitane i Israels hender, og Israel bannstøytte dei og byane deira; sidan kalla dei den staden Horma. /[17]

⁴Frå Horfjellet tok dei leidi burt imot Raudehavet og vilde fara ikring Edomlandet. Men på vegen vart folket utoluge;

⁵dei lasta Gud og Moses og sa: Kvi hev de ført oss upp frå Egyptarland? No lyt me døy her i øydemarki; for her finst det korkje brød eller vatn, og me er hjarteleide av denne veike maten.

⁶Då sende Herren seraformar, som for imillom folket og hogg dei, so mange av dei døydde. /[18]

⁷So kom dei til Moses og sa: Me synda då me lasta Herren og deg. Bed Herren at han vil fria oss frå ormane! Då bad Moses for folket.

⁸Og Herren sa til Moses: Gjer deg ein seraform og set han upp på ei stong, so skal kvar ein som er ormhoggen og ser burt på han, få leva.

⁹So gjorde Moses ein koparorm og sette han på ei stong, og kvar gong ormane hadde hogge nokon og han såg burt på koparormen, fekk han leva.

¹⁰Sidan tok Israels-borni i vegen att og lægra seg i Obot.

¹¹So tok dei ut frå Obot og lægra seg ved Ije-Ha'abarim i øydemarki austanfor Moab.

¹²So for dei derifrå og slo læger i Sereddalen.

¹³So for dei lenger og slo læger på hi sida av Arnonelvi, der som ho kjem utfor Amoritarlandet og renn igjenom øydemarki. Arnon er landskilet åt Moab og byter millom Moab og amoritane.

¹⁴Difor stend det i boki um Herrens herferder: Vaheb tok dei med storm, og bekkene, Arnonbekkene,

¹⁵og bekkelidi som tøygjer seg burtåt Arbygdi og hallar seg uppåt Moabgrensa.

¹⁶So for dei til Be'er; det er den brunnen som Herren tala um då han sa til Moses: Kalla i hop folket, so skal eg gjeva dei vatn!

¹⁷Då song Israel denne songen: Vell upp, du brunn! Helsa han med song!

¹⁸Du brunn som hovdingar hev grave, som dei gjevast av folket hev bora med styrarstav, med kongsstavane sine! Frå øydemarki for dei so til Matana,

¹⁹og frå Matana til Nahaliel, og frå Nahaliel til Bamot,

²⁰og frå Bamot til den dalen som ligg i Moabmarki, tett med toppen på Pisgafjellet, og der ein ser utyver øydemarki.

²¹Israel sende bod til Sihon, kongen yver amoritane, og sa:

²²Lat meg få fara igjenom landet ditt! Me skal ikkje koma inn på åkrane eller i vingardane og ikkje drikka av brunnane; me skal halda oss etter kongsvegen, til me er komne igjenom landet ditt.

²³Men Sihon vilde ikkje gjeva Israel lov til å fara gjenom landet; han samla alt herfolket sitt og for ut i øydemarki mot Israel. Då han kom til Jahas, møtte han dei og rauk på dei.

²⁴Men Israel hogg han ned med kvasse sverd og tok landet hans frå Arnon til Jabbok, til Ammonriket; for landskilet åt Ammons-borni var tettsett med borger.

²⁵Og Israel la under seg alle desse byane og busette seg i alle amoritarbyane, i Hesbon og alle dei byane som høyrde til.

²⁶For Hesbon var hovudstaden åt Sihon, amoritarkongen; han hadde havt ufred med den fyre kongen i Moab og teke frå han alt landet heilt til Arnon.

²⁷Difor segjer skalden: Kom hit, kom hit til Hesbon, bygg upp att Sihons borg!

²⁸For eld for ut frå Hesbon, ein loge frå Sihons stad; han øydde Ar i Moab, dei som budde på Arnonhøgdene.

²⁹Usæl du, Moab! Det er ute med deg, Kamos-folk! Han hev sendt sønene sine som rømingar og døtterne sine i fangeferd til Sihon, amoritarkongen. /[19]

³⁰Me skaut dei ned; Hesbon er lagd øyde, alt til Dibon. Me herja til Nofah, med eld alt burt åt Medba.

³¹So vart Israel buande i Amoritarlandet.

³²Moses sende njosnarar til Jaser, og dei la under seg alle byane der ikring; og han dreiv ut amoritane som budde der. /[20]

³³So tok dei på ei onnor leid og for uppetter til Basan; og Og, kongen i Basan; for i mot dei til Edre'i med alt herfolket sitt og baud ufred.

³⁴Då sa Herren til Moses: Du treng ikkje vera redd han! Eg hev gjeve han i dine hender med alt folket og landet hans, og du kann gjera med han som du gjorde med Sihon, kongen yver amoritane, som budde i Hesbon.

³⁵So hogg dei han ned, både han og sønene og alt folket hans, so ingen vart att eller slapp undan, og sidan eigna dei til seg landet.