Read nynorsk 1938 Fjerde Mosebok 23 Bible Online

Fjerde Mosebok 23 - nynorsk 1938 bible

Fjerde Mosebok 23

¹Då sa Bileam til Balak: Bygg sju altar for meg her, og få meg hit sju uksar og sju verar!

²Balak gjorde som Bileam sa, og Balak og Bileam ofra ein ukse og ein ver på kvart altar.

³So sa Bileam til Balak: Statt her innmed brennofferet ditt medan eg gjeng burt eit bel; kann henda Herren kjem til møtes med meg; kva han då let meg sjå, det skal eg segja med deg. So gjekk han upp på ei treberr høgd;

⁴der kom Gud til møtes med han, og Bileam sa til han: No hev eg stelt til sju altar og ofra ein ukse og ein ver på kvart altar.

⁵Då la Herren eit ord i munnen på han og sa: Gakk attende til Balak og tale so som eg no hev lært deg.

⁶Då han kom attende, såg han Balak stod ved brennofferet sitt saman med alle Moabs hovdingar.

⁷Då tok han til å kveda og sa: Or Aram Balak hit meg hentar, or austerfjelli Moab-kongen: Kom og banna Jakob for meg! Kom og lys vondt yver Israel!

⁸Korleis kann eg banna den som ikkje Gud bannar? Korleis kann eg lysa vondt yver den som Herren ikkje lyser vondt yver?

⁹For frå høgste nuten ser eg han, og frå haugane skoder eg han: Sjå det er eit folk som bur for seg sjølv, og millom heidningfolki reknar det seg ikkje.

¹⁰Kven kann upprekna Jakobs ætt, tallaus som dusti, eller telja fjordeparten av Israel? Gjev eg fekk døy som desse gode og enda ferdi so som dei!

¹¹Då sa Balak til Bileam: Kva er det du gjer? Til å banna fiendane mine fekk eg deg hit, og so hev du velsigna dei!

¹²Bileam svara: Lyt eg ikkje halda meg etter dei ordi som Herren legg meg i munnen?

¹³Då sa Balak: Kjære, kom og ver med meg til ein annan stad, som du kann sjå dei frå - men du kjem berre til å få sjå enden av lægret; heile lægret fær du ikkje sjå - og banna dei for meg der!

¹⁴So tok han Bileam med seg til speiarhaugen på toppen av Pisga; der bygde han sju altar og ofra ein ukse og ein ver på kvart altar.

¹⁵Og Bileam sa til Balak: Statt her innmed brennofferet ditt; eg vil ganga der burt og sjå um eg fær ei openberring.

¹⁶So kom Herren til møtes med Bileam og la eit ord i munnen hans og sa: So skal du tala når du kjem attende til Balak!

¹⁷Då han kom attende, stod Balak endå ved brennofferet og Moabs hovdingar med han; og Balak spurde: Kva sa Herren?

¹⁸Då tok Bileam til å kveda og sa: Statt upp, Balak, og høyr! Lyd på meg du son åt Sippor!

¹⁹Gud er ikkje eit menneske, so han skulde ljuga, eller eit mannebarn, so han skulde angra; skulde han segja noko og ikkje gjera det, skulde han tala og ikkje setja det i verk?

²⁰Velsigning sende han; hev han velsigna, so kann eg ikkje venda det.

²¹Ikkje skodar han urett i Jakob, og ikkje ser han urett i Israel; Herren hans Gud er med han, og kongejubel høyrest der.

²²Gud førde dei ut or Egyptarland; styrke hev dei som ein villukse.

²³For ikkje finst det trolldom i Jakob, og ikkje spådomskunster i Israel; når stundi er der, vert det sagt til Jakob og til Israel kva Gud vil gjera.

²⁴Sjå - eit folk som ris som ei løvemor, lyfter seg til sprang som ei løva; det legg seg ikkje fyrr det hev metta seg med rov og drukke blod av dei det drap.

²⁵Då sa Balak til Bileam: Du skal ikkje banna dei eller velsigna dei!

²⁶Bileam svara: Hev eg ikkje sagt deg at eg i eitt og alt lyt gjera som Herren segjer?

²⁷Då sa Balak: Kjære, kom, so skal eg fylgja deg til ein annan stad; kann henda Gud ikkje hev noko imot at du bannar dei for meg der.

²⁸So tok han Bileam med seg upp på toppen av Peorfjellet, der ein ser utyver øydemarki.

²⁹Då sa Bileam til han: Bygg sju altar for meg her og få meg hit sju uksar og sju verar!

³⁰Og Balak gjorde som Bileam sa, og ofra ein ukse og ein ver på kvart altar.