Read nynorsk 1938 Fjerde Mosebok 29 Bible Online

Fjerde Mosebok 29 - nynorsk 1938 bible

Fjerde Mosebok 29

¹Den fyrste dagen i den sjuande månaden skal de halda eit heilagt møte og må ikkje gjera noko utearbeid; den dagen skal lurane ljoma hjå dykk,

²og de skal bera fram eit brennoffer som angar godt for Herren: ein ung ukse, ein ver, sju årsgamle lamb utan lyte,

³og matofferet som høyrer til: fint mjøl, blanda med olje, tri tiandepartar av ein efa attåt uksen og tvo tiandepartar attåt veren,

⁴og ein tiandepart for kvart av dei sju lambi,

⁵og so ein syndofferbukk til å gjera soning for dykk med,

⁶umfram månads-brennofferet og matofferet som høyrer til det, og umfram det faste brennofferet med sitt matoffer og dei vanlege drykkofferi, eit eldoffer som angar godt for Herren.

⁷Tiande dagen i den same sjuande månaden skal de halda eit heilagt møte. Då skal de fasta og ikkje gjera noko utearbeid;

⁸og de skal bera fram for Herren eit brennoffer som angar godt: ein ung ukse, ein ver, sju årsgamle lamb - lytelause skal dei vera -

⁹og matofferet som høyrer til: fint mjøl, blanda med olje, tri tiandepartar av ein efa attåt uksen og tvo tiandepartar attåt veren,

¹⁰og ein tiandepart for kvart av dei sju lambi,

¹¹og so ein geitebukk til syndoffer, umfram sonings-syndofferet og det daglege brennofferet med matoffer og drykkoffer som høyrer til.

¹²Femtande dagen i den sjuande månaden skal de samlast til eit heilagt møte og må ikkje gjera noko utearbeid; og de skal halda helg for Herren i sju dagar.

¹³Då skal de bera fram eit brennoffer, eit eldoffer som angar godt for Herren: trettan unge uksar, tvo verar, fjortan årsgamle lamb - lytelause skal dei vera -

¹⁴og matofferet som høyrer til: fint mjøl blanda med olje, tri tiandepartar av ein efa for kvar av dei trettan uksane og tvo tiandepartar for kvar av dei tvo verane,

¹⁵og ein tiandepart for kvart av dei fjortan lambi,

¹⁶og so ein geitebukk til syndoffer, umfram det daglege brennofferet med sitt matoffer og drykkoffer.

¹⁷Andre dagen skal de bera fram tolv unge uksar, tvo verar, fjortan årsgamle lamb utan lyte,

¹⁸og matoffer og drykkoffer som vanleg, svarande til uksane og verane og lambi etter talet,

¹⁹og ein geitebukk til syndoffer, umfram det daglege brennofferet med sitt matoffer og sine drykkoffer;

²⁰tridje dagen elleve uksar, tvo verar, fjortan årsgamle lamb utan lyte,

²¹og matoffer og drykkoffer som vanleg, svarande til uksane og verane og lambi etter talet,

²²og ein geitebukk til syndoffer, umfram det daglege brennofferet med sitt matoffer og drykkoffer;

²³fjorde dagen ti uksar, tvo verar, fjortan årsgamle lamb utan lyte,

²⁴med matoffer og drykkoffer som vanleg, svarande til uksane og verane og lambi etter talet,

²⁵og ein geitebukk til syndoffer, umfram det daglege brennofferet med sitt matoffer og drykkoffer;

²⁶femte dagen ni uksar, tvo verar, fjortan årsgamle lamb utan lyte,

²⁷med matoffer og drykkoffer som vanleg, svarande til uksane og verane og lambi etter talet,

²⁸og ein geitebukk til syndoffer, umfram det daglege brennofferet med sitt matoffer og drykkoffer;

²⁹sette dagen åtte uksar, tvo verar, fjortan årsgamle lamb utan lyte,

³⁰med matoffer og drykkoffer som vanleg, svarande til uksane og verane og lambi etter talet,

³¹og ein geitebukk til syndoffer, umfram det daglege brennofferet med sitt matoffer og drykkoffer;

³²sjuande dagen sju uksar, tvo verar, fjortan årsgamle lamb utan lyte,

³³med matoffer og drykkoffer som vanleg, svarande til uksane og verane og lambi etter talet,

³⁴og ein geitebukk til syndoffer, umfram det daglege brennofferet med sitt matoffer og drykkoffer;

³⁵Åttande dagen skal de halda ei stor samlingshøgtid og må ikkje gjera noko utearbeid;

³⁶og de skal bera fram eit brennoffer, eit eldoffer som angar godt for Herren: ein ukse, ein ver, sju årsgamle lamb utan lyte,

³⁷med matoffer og drykkoffer som vanleg, svarande til uksen og veren og lambi etter talet,

³⁸og ein geitebukk til syndoffer, umfram det daglege brennofferet med sitt matoffer og drykkoffer;

³⁹Dette er det de skal ofra Herren på høgtidene dykkar, umfram lovnadsofferi og dei friviljuge offeri dykkar, anten det er brennoffer eller matoffer eller drykkoffer eller takkoffer.