Read nynorsk 1938 Fjerde Mosebok 30 Bible Online

Fjerde Mosebok 30 - nynorsk 1938 bible

Fjerde Mosebok 30

¹Og Moses sa dette til Israels-borni, heiltupp soleis som Herren hadde sagt han fyre.

²Sidan tala Moses til hovdingane yver Israels-ættene og sa: Høyr no eit anna bod som Herren hev gjeve:

³Når ein mann gjev ein lovnad til Herren eller sver ein eid at han vil halda seg frå ymse ting, so skal han ikkje brjota ordet sitt; det han hev lova skal han halda.

⁴Når ei ung kvinna som endå er heime hjå far sin, gjer ein lovnad til Herren og sver at ho vil halda seg ifrå ymse ting,

⁵og far hennar fær høyra um lovnaden hennar og eiden ho hev bunde seg med, og tegjer til det, so skal det gjelda alt det ho hev lova, og kvar eid ho hev bunde seg med, skal gjelda.

⁶Men dersom far hennar same dagen som han fær høyra um noko lovnad ho hev gjort, eller nokon eid ho hev bunde seg med, forbyd henne å halda sitt ord, so skal det vera um inkje, og Herren skal gjeva henne til, etter di det var faren som meinka henne.

⁷Vert ho gift og hev ein lovnad på seg eller hev bunde seg med eit tankelaust ord,

⁸og mannen hennar fær vita det, men ikkje segjer noko imot den dagen han fær høyra um det, då skal det gjelda det ho hev lova, og det ordet ho hev bunde seg med, skal gjelda.

⁹Men dersom mannen hennar same dagen som han fær vita det, forbyd henne å halda sitt ord, so gjer han lovnaden ho hev på seg, um inkje, og like eins det tankelause ordet ho hev bunde seg med, og Herren skal gjeva henne til.

¹⁰Hev ei enkja eller fråskild kona gjort ein lovnad og nemnt noko ho vil halda seg ifrå, so skal ho halda ord.

¹¹Dersom ei kona etter ho er gift, hev lova noko eller bunde seg med eid til å halda seg ifrå eitt eller anna,

¹²og mannen hennar fær vita det, men tegjer og ikkje forbyd henne å halda sitt ord, so skal det gjelda alt det ho hev lova, og kvar eid ho hev bunde seg med, skal gjelda.

¹³Men dersom mannen hennar gjer det um inkje same dagen som han fær høyra um det, so gjeld ikkje noko av dei ordi ho soleis hev slept av munnen, anten det er ein lovnad ho hev gjort, eller det er noko ho hev svore seg ifrå; mannen hennar hev gjort det um inkje, og Herren skal gjeva henne til.

¹⁴Kvar lovnad ho hev gjort, og kvar eid ho hev svore um å halda seg ifrå eitt eller hitt og fasta, kann mannen hennar anten stadfesta eller gjera um inkje.

¹⁵Tegjer han um det til andre dagen, so hev han stadfest alt det ho hev lova eller bunde seg til; han hev stadfest det, med di han tagde då han fekk vita det.

¹⁶Men gjer han det fyrst um inkje ei tid etter han fekk høyra um det, so ber han ansvaret for brotet hennar.

¹⁷Dette er dei fyresegnene Herren gav Moses um den retten ein mann hev yver kona si, og ein far yver dotter si so lenge ho er ung og endå heime hjå faren.