Read nynorsk 1938 Fjerde Mosebok 32 Bible Online

Fjerde Mosebok 32 - nynorsk 1938 bible

Fjerde Mosebok 32

¹Rubens-borni og Gads-borni hadde mykje bufe - uhorveleg mykje. Då dei no såg dei gode beitemarkene i landet kring Jaser og i Gileadlandet,

²kom dei og sa til Moses og Eleasar, presten, og hovdingane i lyden:

³Atarot og Dibon og Jaser og Nimra og Hesbon og El'ale og Sebam og Nebo og Beon,

⁴dei bygdene som Herren hev late Israels-lyden vinna med sverdet, det er gode febygder, og tenarane dine hev mykje fe.

⁵Vil du gjera vel mot oss, sa dei, so lat tenarane dine få det landet til odel og eiga, og lat oss sleppa å fara yver Jordan!

⁶Då sa Moses til Gads-borni og Rubens-borni: Skal brørne dykkar ganga i striden og de setja dykk til her?

⁷Vil de då gjera Israels-borni uhuga til å fara yver åt det landet som Herren hev gjeve dei?

⁸Det var det federne dykkar gjorde då eg sende dei ut frå Kades-Barnea til å skoda landet;

⁹Dei for upp til Eskoldalen og såg på landet, og so skræmde dei Israels-borni, so dei miste hugen til å ganga inn i det landet som Herren hadde gjeve dei.

¹⁰Den dagen vart Herren brennande harm og han svor:

¹¹Ingen av dei mennene som for upp frå Egyptarland og er yver tjuge år gamle, skal få sjå det landet eg hev lova Abraham og Isak og Jakob; for dei hev ikkje fylgt meg som dei skulde -

¹²ingen utan Kaleb Jefunneson av Kenas-ætti og Josva Nunsson; dei hev vore trugne til å fylgja Herren.

¹³Herren vart harm på Israel og let dei flakka ikring i øydemarki i fyrti år, til det var ende på heile den ætti som hadde gjort det som vondt var i Herrens augo.

¹⁴Og no stig de i fari etter fedrene dykkar, eit elde av syndige menner, og aukar endå meir Herrens harme imot Israel.

¹⁵For vender de dykk burt og ikkje vil fylgja han, so kjem han til å halda Israel endå lenger i øydemarki, og de fører ulukka yver heile dette folket.

¹⁶Då gjekk dei fram for Moses og sa: Me vil gjera kvier for feet vårt her og byggja byar for kvinnone og borni våre;

¹⁷men sjølve vil me vepna oss snøggast me vinn, og fara fyre dei hine Israels-borni, til me hev ført dei dit dei skal; men kvinnone og borni våre skal sitja att i borgene, so dei kann vera trygge for folket her i landet.

¹⁸Me skal ikkje venda heim att fyrr Israels-borni hev fenge kvar sin eigedom;

¹⁹for me vil ikkje taka land saman med dei andre på hi sida Jordan og lenger undan når me hev fenge vårt land på denne sida, austanfor Jordan.

²⁰Då sa Moses til dei: Ja, gjer de det, væpnar de dykk til striden for Herrens åsyn,

²¹og alle stridsmennene dykkar fer yver Jordan for Herrens åsyn, til han hev drive fiendane sine or syne,

²²og vender de ikkje heim att fyrr landet er vunne for Herrens åsyn, so skal de vera utan skuld både for Herren og får Israel, og dette landet her skal vera dykkar eigedom for Herrens åsyn.

²³Men gjer de det ikkje, då syndar de mot Herren og skal få kjenna at syndi finn dykk att.

²⁴Bygg dykk no byar for kvinnone og borni dykkar, og stell til kvier for småfeet, og gjer som de hev lova!

²⁵Då sa Gads-borni og Rubens-borni til Moses: Tenarane dine skal gjera som du hev sagt, herre;

²⁶borni og konone våre og feet og alle kløvdyri skal vera her i Gileadsbyane;

²⁷men me, tenarane dine, vil ganga yver Jordan for Herrens åsyn til strid, kvar våpnfør mann, soleis som du, herre, segjer.

²⁸So tala Moses um dei til Eleasar, presten, og Josva Nunsson og hovdingane yver alle Israels-ættene

²⁹og sa: Gjeng Gads-borni og Rubens-borni, so mange som er våpnføre, med dykk yver Jordan til strid for Herrens åsyn, og landet vert teke, so skal de gjeva dei Gileadlandet til eigedom.

³⁰Men gjeng dei ikkje stridsbudde med dykk yver, so skal dei få eigedomen sin i Kana'anslandet, saman med dykk andre.

³¹Og Gads-borni og Rubens-borni svara: Det som Herren hev sagt til tenarane dine, det vil me gjera;

³²me vil fara stridsbudde yver til Kana'anslandet for Herrens åsyn, men odelseiga vår skal vera her på denne sida av Jordan.

³³Då gav Moses Gads-borni og Rubens-borni og halve Manasse-ætti dei riki som Sihon, amoritarkongen, og Og, kongen i Basan, hadde ått, heile landet med alle byane rundt ikring og markene som høyrde til.

³⁴Og Gads-borni bygde upp att Dibon og Atarot og Aroer

³⁵og Atrot-Sofan og Jaser og Jogbeha

³⁶og Bet-Nimra og Bet-Haran - faste byar og fekvier.

³⁷Og Rubens-borni bygde upp att Hesbon og El'ale og Kirjata'im

³⁸og Nebo og Ba'al-Meon - som dei brigda namnet på - og Sibma; og dei gav dei byane som dei bygde upp att namni deira.

³⁹Borni åt Makir, Manasses son, for til Gileadlandet og tok det og dreiv ut amoritane som budde der.

⁴⁰Og Moses gav Makir, Manasses son, Gilead, og han sette seg ned der. /[30]

⁴¹Ja'ir, son åt Manasse, for av stad og tok tjeldbyane deira og kalla dei Ja'irsbyane. /[31]

⁴²Og Nobah for av og tok Kenat og småbyane der ikring og gav borgi sitt eige namn, Nobah.