Read nynorsk 1938 Fjerde Mosebok 34 Bible Online

Fjerde Mosebok 34 - nynorsk 1938 bible

Fjerde Mosebok 34

¹Og Herren tala til Moses og sa:

²Seg til Israels-borni: Når de kjem inn i Kana'anslandet - det er det landet de skal hava og eiga, heile Kana'anslandet so vidt som det er -

³so skal landet dykkar på sudsida ganga frå Sinøydemarki langs med Edom, og den søre bytestrengen skal i aust ganga ut ifrå enden av Saltsjøen

⁴og svinga sudum Akrabbimskardet og so taka yver til Sin; so skal han ganga ut sunnanfor Kades-Barnea, til han når Hasar-Addar, og so taka yver til Asmon;

⁵frå Asmon skal bytet svinga burt til Egyptarlands-bekken og so ganga i havet.

⁶I vest skal landet støyta til Storhavet; det skal vera landskilet dykkar mot vest.

⁷På nordsida skal landskilet ganga soleis. Frå Storhavet skal de draga skiftelina til Horfjellet

⁸og frå Horfjellet dit som vegen ber til Hamat; der skal bytet ganga ut ved Sedad;

⁹sidan skal det halda fram til Sifron og so enda ved Hasar-Enan. Dette skal vera landskilet dykkar mot nord.

¹⁰I aust skal de setja landskilet etter ei lina som gjeng frå Hasar-Enan til Sefam.

¹¹Frå Sefam skal bytet ganga nedetter til Ribla, i aust for Ajin, og so lenger ned, til det når berghallet austanfor Kinneretsjøen; /[32]

¹²so skal det ganga nedåt Jordan og ut i Saltsjøen. Det skal vera landet dykkar etter bytemerki sine rundt ikring.

¹³Og Moses sa til Israels-borni: Dette er det landet som de skal få til odel og eiga; de skal skifta det i luter og kasta lut um dei; det er det landet som Herren hev sagt skal gjevast åt dei ni ættene og den eine halve ætti.

¹⁴For Rubens-ætti med greinene sine og Gads-ætti med sine greiner og den halve Manasse-ætti hev fenge dei eigone dei skal hava;

¹⁵desse tvo ættene og den halve ætti hev fenge sin eigedom på denne sida av Jordanelvi, midt for Jeriko - i aust, mot solrenningi.

¹⁶Og Herren tala til Moses og sa:

¹⁷Høyr no kva dei er for menner som skal skifta ut landet millom dykk; Eleasar, presten, Josva Nunsson

¹⁸og so ein hovding frå kvar ætt, som de skal taka til utskiftingsmann;

¹⁹det er av Juda-ætti Kaleb, son åt Jefunne,

²⁰og av Simeons-ætti Semuel, son åt Ammihud,

²¹og av Benjamins-ætti Elidad, son åt Kislon;

²²so ein hovding av Dans-ætti: Bukki, son åt Jogli,

²³og av Josefs-borni ein hovding av Manasse-ætti: Hanniel, son åt Efod,

²⁴og ein hovding av Efra'ims-ætti: Kemuel, son åt Siftan;

²⁵so ein hovding av Sebulons-ætti. Elisafan, son åt Parnak,

²⁶og ein hovding av Issakars-ætti: Paltiel, son åt Assan,

²⁷og ein hovding av Asers-ætti: Akihud, son åt Selomi,

²⁸og ein hovding av Naftali-ætti: Pedael, son åt Ammihud.

²⁹Desse mennene var det som Herren sa skulde skifta eigedomane millom Israels-borni i Kana'anslandet.