Read nynorsk 1938 Fjerde Mosebok 36 Bible Online

Fjerde Mosebok 36 - nynorsk 1938 bible

Fjerde Mosebok 36

¹Husfedrene i ætti etter Gilead, som var son åt Makir, Manasses son, og høyrde til Josefs-ættene, gjekk fram og tala so til Moses og styresmennene, ættehovdingane åt Israels-borni:

²Herren hev sagt at du, herre, skal byta landet i luter og lata Israels-borni kasta lut um dei, og han hev sagt at du skal lata døtterne åt Selofhad, bror vår, få eigedomen etter far sin.

³Men vert no dei gifte med menner av dei andre Israels-ættene, so gjeng eigedomen deira ifrå vår ætt, og jordi åt den ætti dei kjem inn i, aukar, men vår ættejord minkar.

⁴Og når jubelåret kjem hjå Israels-borni, so vert eigedomen åt desse gjentone lagd til den ætti som dei hev kome inn i, og teken ifrå vår ætt.

⁵Då tala Moses til Israels-borni, so som Herren hadde sagt han fyre: Det er rett som Josefs-ætti segjer.

⁶Høyr no kva Herrens vilje er med døtterne åt Selofhad: Dei kann gifta seg med kven dei vil, men det lyt vera innan fedreætti deira.

⁷For ingen eigedom må hjå Israels-borni ganga yver frå ei ætt til ei onnor. Alle Israels-borni skal halda på eigedomen åt fedreætti si.

⁸Og kvar ei dotter som erver jord i eit av Israelsfylki, lyt gifta seg med ein frå same fylket, so kvar Israels-son kann erva odelsjordi etter federne sine,

⁹og ingen eigedom skal ganga yver frå ei ætt til ei onnor, men alle Israels-ættene halda på eigedomen sin.

¹⁰Og døtterne åt Selofhad gjorde som Herren hadde sagt til Moses.

¹¹Mahla og Tirsa og Hogla og Milka og Noa, alle døtterne åt Selofhad, gifte seg med søner åt farbrørne sine;

¹²med menner som var ætta frå Manasse, son åt Josef, gifte dei seg, so odelen deira kom til å fylgja den ætti dei høyrde til.

¹³Dette er dei bodi og lovene som Herren let Moses kunngjera for Israels-borni på Moabmoane ved Jordanelvi, midt for Jeriko.