Read nynorsk 1938 Fjerde Mosebok 8 Bible Online

Fjerde Mosebok 8 - nynorsk 1938 bible

Fjerde Mosebok 8

¹Og Herren sa til Moses:

²Tala til Aron og seg til han: Når du set upp lampone, so skal du laga det so at alle sju lampone kastar ljoset frametter, på romet framanfor ljosestaken.

³Og Aron gjorde so; han sette upp lampone so ljoset fall frametter, på romet framfor ljosestaken, som Herren hadde sagt Moses fyre.

⁴Ljosestaken var gjord av drive gull; både leggen og kruna var drive arbeid. Etter det bilete som Herren hadde synt Moses, hadde han gjort ljosestaken.

⁵Og Herren tala til Moses og sa:

⁶Du skal taka ut levitane millom Israels-borni og reinsa dei.

⁷So skal du fara åt når du reinsar dei: Du skal skvetta reinsingsvatn på dei, og dei skal fara yver heile lekamen med rakekniven og tvo klædi sine, so dei er reine.

⁸So skal dei taka ein ung ukse og matofferet som høyrer til: fint mjøl blanda med olje, og til syndoffer skal du taka ein annan ung ukse.

⁹Du skal segja til levitane at dei skal koma fram til møtetjeldet, og so skal du kalla i hop heile Israels-lyden

¹⁰og føra levitane fram for Herrens åsyn. So skal Israels-borni leggja hendene på levitane,

¹¹og Aron skal vigja dei for Herrens åsyn til eit svingeoffer frå Israels-borni; og sidan skal dei tena Herren; det skal vera deira kall.

¹²So skal levitane leggja hendene på hovudet åt uksane, og du skal ofra den eine til syndoffer og den andre til brennoffer åt Herren og gjera soning for levitane.

¹³So skal du då føra levitane fram for Aron og sønene hans og vigja dei, so dei vert eit svingeoffer for Herren.

¹⁴Soleis skal du skilja levitane ut ifrå hine Israels-borni, og dei skal høyra meg til,

¹⁵og sidan, når du hev reinsa og vigt dei, skal dei koma og gjera tenesta i møtetjeldet.

¹⁶For dei er ei gåva til meg, ei gåva frå Israels-borni; eg valde meg dei i staden for dei som kjem fyrst frå morsliv, alt det som er frumbore hjå Israels-borni.

¹⁷For mitt er alt det som er frumbore hjå Israels-borni, både folk og fe; den dagen eg slo i hel alt frumbore i Egyptarlandet, helga eg det åt meg.

¹⁸Men no hev eg teke levitane i staden for alle dei frumborne Israels-borni;

¹⁹eg tok dei ut millom Israels-borni og gav dei til Aron og sønene hans, på den måten at dei skulde gjera tenesta i møtetjeldet for Israels-borni og gjera soning for dei, so Israels-borni ikkje skal koma innåt heilagdomen og soleis føra ulukka yver seg.

²⁰Moses og Aron og heile Israels-lyden gjorde i alle måtar so med levitane som Herren hadde sagt Moses fyre.

²¹Og levitane reinsa seg og tvo klædi sine, og Aron vigde dei for Herrens åsyn og gjorde soning for dei, so dei vart reine,

²²og so kom dei og gjorde arbeidet sitt i møtetjeldet for augo åt Aron og sønene hans. Som Herren hadde sagt Moses fyre, so gjorde dei med levitane.

²³Og Herren tala til Moses og sa:

²⁴Dette er lovi som gjeld for levitane: Frå dei er fem og tjuge år gamle, skal dei standa i tenesta og gjera alt det arbeidet som trengst i møtetjeldet;

²⁵men so snart dei hev fyllt femti år, skal dei gjeva seg utor tenesta og ikkje arbeida lenger.

²⁶Dei kann vera brørne sine til hjelp i møtetjeldet med eitt og anna som er å gjera der, men dei skal ikkje hava fast tenesta. Soleis skal du skipa det med levitane og tenesta deira.