Read nynorsk 1938 Sefanja 2 Bible Online

Sefanja 2 - nynorsk 1938 bible

Sefanja 2

¹Tenk etter og sansa deg, du folk som ikkje blygjest,

²fyrr Guds rådgjerd føder - som agner fer dagen fram - fyrr Herrens brennande vreide kjem yver dykk, fyrr Herrens vreide-dag kjem yver dykk!

³Søk Herren, alle de audmjuke i landet, som held lovi hans! Søk rettferd, søk audmykt! Kann henda vert de då livde på Herrens vreide-dag!

⁴For Gasa skal verta folketomt, Askalon til ei audn; Asdod-folket skal jagast ut midt på ljose dagen og Ekron rykkjast upp med rot.

⁵Usæle dei som bur i bygdene utmed havet, kretarfolket! Herrens ord kjem yver deg, Kana'an, du Filistarland, eg vil leggja deg i øyde, so ingen skal bu i deg.

⁶Og bygdene utmed havet skal liggja til hamnegang med gøymestader for hyrdingane og med sauegardar.

⁷Og det skal verta ei bygd for dei som vert att av Judas hus; der skal dei hava beite, i Askalonhusi skal dei liggja um kvelden. For Herren deira Gud skal sjå til dei, og gjera deira fangetid.

⁸Eg hev høyrt svivyrdingi frå Moab og spottordi frå Ammons-borni, då dei svivyrde mitt folk og briska seg mot landet deira.

⁹Difor, so visst som eg lever, segjer Herren, allhers Gud, Israels Gud, skal det ganga Moab som Sodoma og Ammons-borni som Gomorra: Dei skal verta ei netlemark, saltgruva og øydemark til æveleg tid. Resten av folket mitt, skal plundra dei; dei som vert att av lyden min skal få dei til eiga.

¹⁰Dette skal henda dei for deira storlæte, for di dei svivyrde og briska seg mot folket åt Herren, allhers Gud.

¹¹Skræmeleg skal Herren te seg mot dei; for han skal øyda ut alle gudane på jordi, og alle heidningstrendene skal kasta seg ned for han, kvart folk på sin stad.

¹²De og, etiopar, vert gjenomstungne av sverdet mitt.

¹³Han retter ut handi mot nord og tyner Assur og gjer Ninive til ein audn, turr som ei øydemark.

¹⁴Hjorder skal lægra seg der; alle slag villdyrflokkar, både pelikanar og bustyvel, skal natta på sulehovudi der; fuglelåt høyrast i vindaugo, grus ligg på dørstokken, for sederpanelet hev han rive.

¹⁵Dette er den jublande byen, som budde so trygt og sa i sitt hjarta: Eg og ingen annan! Kor aud han er vorten, eit læger for villdyr! Kvar den som framum fer, blistrar og vinkar hædande med handi.