Read nynorsk 1938 Haggai 1 Bible Online

Haggai 1 - nynorsk 1938 bible

Haggai 1

¹I andre styringsåret åt kong Darius, fyrste dagen i sette månaden, kom Herrens ord ved profeten Haggai til Serubabel Sealtielsson, jarl yver Juda, og til Josva Jehosadaksson, øvstepresten, og det lydde so:

²So segjer Herren, allhers Gud: Dette folket segjer: Det er ikkje endå tid til å koma, tid til å byggja Herrens hus.

³So kom då Herrens ord ved profeten Haggai:

⁴Er det då tid for dykk sjølve å bu i dykkar bordklædde hus, medan dette huset ligg i øyde?

⁵Og no segjer Herren, allhers Gud, so: Akta på korleis det gjeng dykk!

⁶De sår mykje, men fær lite i hus; de et, men vert ikkje mette; de drikk, men sløkkjer ikkje torsten; de klæder dykk, men ingen vert varm; leigetenaren fær si løn i ein botnelaus pung.

⁷So segjer Herren, allhers Gud: Akta på korleis det gjeng dykk!

⁸Far til fjells og henta timber og bygg upp templet, so eg kann hava hugnad i det og syna meg herleg, segjer Herren.

⁹De vonar mykje og vinn lite, og når de ber det i hus, so blæs eg det burt. Kvifor? segjer Herren, allhers Gud. Jau, for mitt hus skuld, av di det ligg i øyde, medan de sjølve hev det annsamt kvar med sitt hus.

¹⁰Difor hev himmelen meinka dykk dogg og jordi meinka dykk grøda.

¹¹Eg hev kalla turk yver land og fjell, yver korn og druvesaft og olje og alt som gror på marki, yver folk og fe og all dykkar arbeidsvinning.

¹²Serubabel Sealtielsson og Josva Jehosadaksson, øvstepresten, og alt det som var att av folket, lydde på Herren sin Gud og ordi frå profeten Haggai, av di Herren deira Gud hadde sendt han; og folket bar age for Herren.

¹³Og Haggai, Herrens sendebod, bar fram Herrens bod til folket: Eg er med dykk, segjer Herren.

¹⁴Og Herren kveikte hugen hjå Serubabel Sealtielsson, jarlen yver Juda, og hjå Josva Jehosadaksson, øvstepresten, og hjå alle dei som var att av folket, so dei la i veg og arbeidde på huset åt Herren deira Gud, allhers Gud;

¹⁵det var den fire og tjugande dagen i sette månaden i andre styringsåret åt kong Darius.