Read nynorsk 1938 Haggai 2 Bible Online

Haggai 2 - nynorsk 1938 bible

Haggai 2

¹Den ein og tjugande dagen i sjuande månaden kom Herrens ord ved profeten Haggai, og det lydde so:

²Tala til Serubabel Sealtielsson, jarlen i Juda, og til Josva Jehosadaksson, øvstepresten, og til det som er att av folket:

³Finst det endå nokon attlevande millom dykk som hev set dette huset i sin fyrre herlegdom? Og kva tykkjer de um det no? Er det ikkje for augo dykkar som inkjevetta?

⁴Men ver hugheil no, Serubabel, segjer Herren, ver hugheil, Josva Jehosadaksson, du øvsteprest, ver hugheilt, alt folket i landet, segjer Herren, og arbeid! For eg er med dykk, segjer Herren, allhers Gud.

⁵Den pakti eg gjorde med dykk då de for ut or Egyptarland, skal standa ved lag, og min Ande skal bu millom dykk. Ver ikkje redde!

⁶For so segjer Herren, allhers Gud: Endå ein gong, um eit lite bel, skal eg skaka himmel og jord og hav og land.

⁷Eg skal skaka alle folki og, so dei dyraste eignelutene frå alle folki skal koma hit, og eg skal fylla dette huset med herlegdom, segjer Herren, allhers Gud.

⁸Sylvet er mitt, og gullet er mitt, segjer Herren, allhers Gud.

⁹Dette siste huset skal verta herlegare enn det fyrre, segjer Herren, allhers Gud; og på denne staden vil eg gjeva fred, segjer Herren, allhers Gud.

¹⁰Den fire og tjugande dagen i niande månaden i andre styringsåret åt kong Darius kom Herrens ord ved profeten Haggai, og det lydde so:

¹¹So segjer Herren, allhers Gud: Spør kva prestane lærer um dette:

¹²Um ein mann ber heilagt kjøt i klædesnippen og so med snippen kjem nær noko brød eller kokemat eller vin eller olje eller anna etande, vert då det heilagt? Prestane svara nei.

¹³So spurde Haggai: Men um ein hev vorte urein av eit lik og so kjem nær noko av dette, vert det då ureint? Prestane svara ja.

¹⁴Då tok Haggai til ords og sa: Soleis er det med denne lyden, og soleis er det med dette folket i mine augo, segjer Herren, og like eins med alt det deira hender gjer; og det dei ofrar der, det er ureint. /[1]

¹⁵Gjev no gaum på tidi frå i dag og attende, fyrr de tok til og la stein på stein i Herrens tempel!

¹⁶Når einkvan i den tidi kom til ein dunge med kornband som han tenkte skulde gjeva tjuge mål, so fann han berre ti; når einkvan kom til vinpersa og vilde ausa upp femti spann, so fekk han ikkje meir enn tjuge.

¹⁷Eg søkte dykk med moldaks og rust og haglver yver alt dykkar arbeid, og endå vende de ikkje um til meg, segjer Herren.

¹⁸Men gjev gaum no på tidi frå i dag og attende, frå fire og tjugande dagen i niande månaden alt til den dagen då Herrens tempel vart tufta! Gjev gaum!

¹⁹Finst det enno att noko sæde i kornburet? Endå hev korkje vintreet eller fiketreet eller granatapalen eller oljetreet bore noko! Men frå i dag skal eg velsigna.

²⁰Andre gongen kom Herrens ord åt Haggai den fire og tjugande dagen i månaden, og det lydde so:

²¹Seg til Serubabel, jarlen yver Juda: Eg skal skaka himmel og jord;

²²eg skal velta i koll kongsstolane og tyna veldet åt dei heidne kongeriki; eg skal velta stridsvognene og dei som stend på dei, og hestane skal stupa, og ridarene med; den eine skal falla for sverdet åt hin.

²³Den dagen, segjer Herren, allhers Gud, tek eg deg, Serubabel Sealtielsson, du min tenar, og gjer deg til ein seglring; for deg hev eg valt ut, segjer Herren, allhers Gud.