Read nynorsk 1938 Sakarja 10 Bible Online

Sakarja 10 - nynorsk 1938 bible

Sakarja 10

¹Herren må de beda um regn i tidi for vårregnet! Herren er det som skaper torever, og han sender fossande flod-skurer, so kvar mann fær grøda på si mark.

²For husgudane tala usant, og spåmennene såg falske syner. Tome draumar kom dei med, og trøysti dei gav, var inkje verd. Difor laut folket reika ikring som ein saueflokk og lida vondt, av di der ikkje var nokon hyrding. /[30]

³Mot hyrdingane er harmen min kveikt, og bukkane vil eg heimsøkja; for Herren, allhers Gud, ser til si hjord, Judas hus, og gjer henne til stashesten sin i striden. /[31]

⁴Frå det skal hyrnesteinane koma, frå det naglane, frå det stridsbogane - frå det skal kvar einaste styresmann koma. /[32][33]

⁵Og dei skal vera lik kjempor som trakkar fiendane sine ned i striden nett som gateskarn; ja, strida skal dei, for Herren er med dei, og dei som rid på hestar, skal verta til skammar.

⁶Eg vil gjera Judas hus sterkt, og Josefs hus skal eg frelsa; ja, eg fører dei atter heim; for eg vil miskunna dei, og dei skal vera liksom eg aldri hadde støytt dei burt. For eg er Herren deira Gud og skal bønhøyra dei.

⁷Efra'ims menner skal vera lik kjempor, og hjarto deira skal gleda seg liksom av vin; borni deira skal sjå det med fagnad, deira hjarto skal frygda seg i Herren.

⁸Eg vil blistra på dei og samla dei, for eg hev løyst dei ut; og dei skal verta likso mangmente som dei fordom var.

⁹Eg vil så dei ut millom folki, men i landi langt burte skal dei minnast meg; og dei skal leva med borni sine og koma heim att.

¹⁰Eg vil føra dei heim att frå Egyptarland, og frå Assur skal eg samla dei; til Gileadlandet og til Libanon fører eg dei, og der skal det skorta på rom åt dei.

¹¹Han skal draga fram gjenom havet, igjenom fårar, og slå ned bylgjone i havet, og alle djupi i Nilen skal turkast ut; Assurs byrgskap skal støytast ned, og kongsstaven skal vika frå Egyptarland. /

¹²Men dei skal eg gjera sterke i Herren, og i hans namn skal dei ferdast, segjer Herren.