Read nynorsk 1938 Sakarja 2 Bible Online

Sakarja 2 - nynorsk 1938 bible

Sakarja 2

¹So lyfte eg augo mine og fekk sjå fire horn.

²Då spurde eg engelen som tala med meg: Kva er dette? Og han sa til meg: Dette er dei horni som hev spreidt Juda, Israel og Jerusalem.

³So let Herren meg sjå fire smedar,

⁴og eg spurde: Kva skal desse gjera? Han svara: Horni hev spreidt Juda, so at ingen torde lyfta hovudet; no er desse komne og skal skræma dei og slå av horni på dei heidningfolki som lyfte horn mot Judalandet til å spreida det.

⁵Og eg lyfte augo mine og fekk sjå ein mann med ei mælesnor i handi.

⁶Då spurde eg: Kvar skal du av? Han svara: Eg skal av og mæla Jerusalem og sjå kor breidt og kor langt det skal vera.

⁷Då kom han fram den engelen som tala med meg, og ein annan engel kom imot han.

⁸Og han sa til han: Spring og seg til den unge mannen der: Fritt og ope skal Jerusalem liggja; slik ei mengd med folk og fe skal finnast der.

⁹Men eg skal sjølv vera ein eldmur rundt ikring, segjer Herren, og eg skal syna meg herleg der inne.

¹⁰Høyr! Høyr! Skunda dykk burt frå Norderlandet, segjer Herren; for eg hev spreidt dykk for alle heimsens fire vindar, segjer Herren.

¹¹Høyr! Sion, berga deg undan, du som bur hjå Babels dotter!

¹²For so segjer Herren, allhers Gud: For si æra skuld hev Herren sendt meg til heidningfolki som plundra dykk; for den som rører dykk, rører ved augnesteinen hans;

¹³for sjå, eg lyfter handi mi mot dei, og dei skal verta til herfang for dei som no er trælane deira; og de skal få sanna at Herren, allhers Gud, hev sendt meg.

¹⁴Ropa høgt av frygd og gleda, du Sions dotter! For sjå, eg kjem og vil bu hjå deg, segjer Herren.

¹⁵Og mange heidningfolk skal gjeva seg til Herren på den dagen og verta mitt folk; ja, eg vil bu hjå deg, og du skal få sanna at Herren, allhers Gud, hev sendt meg til deg.

¹⁶Og til sin eigedom og arvlut skal Herren taka Juda i det heilage landet og endå ein gong velja ut Jerusalem.

¹⁷Ver stilt, alt kjøt, for Herren! For han hev rise upp og gjenge ut or sin heilage bustad.