Read nynorsk 1938 Sakarja 6 Bible Online

Sakarja 6 - nynorsk 1938 bible

Sakarja 6

¹Då eg atter lyfte augo mine, fekk eg sjå fire vogner som kom fram millom tvo fjell, og fjelli var av kopar.

²For den fyrste vogni var det raude hestar, for den andre vogni svarte hestar,

³for den tridje vogni kvite hestar, og for den fjorde vogni var det flekkute, sterke hestar.

⁴Då tok eg til ords og sa til engelen som tala med meg: Kva skal dette tyda, Herre?

⁵Engelen svara: Det er dei fire himmel-vindane. Dei hev vore kalla inn for herren yver all jordi og fer no av stad att.

⁶Vogni med dei svarte hestane for ut mot Norderlandet, dei kvite fylgde etter dei, og dei flekkute for ut mot Sudlandet.

⁷Men då dei sterkaste skulde fara ut, var dei fysne etter å få fara ikring på jordi, og han sa: Gakk, far ikring på jordi! Og dei for ikring på jordi. /[11][12]

⁸So ropa han høgt på meg og sa til meg: Sjå, dei som fer ut imot Norderlandet, dei svalar min harm på Norderlandet.

⁹Og Herrens ord kom til meg, og det lydde so:

¹⁰Tak imot gåvone frå dei landlyste, frå Heldai, Tobia og Jedaja - gakk sjølv på denne dagen inn i huset åt Josias Sefaniasson - for dit er dei komne frå Babel -

¹¹og tak imot sylv og gull av dei og få gjort krunor og set dei på hovudet åt Josva Jehosadaksson, øvstepresten!

¹²Og seg til han: So segjer Herren, allhers Gud: Sjå, det skal koma ein mann som heiter Renning. Frå roti si skal han renna upp, og han skal byggja Herrens tempel. /[13]

¹³Ja, han skal byggja Herrens tempel, og han skal vinna herlegdom og sitja og styra på kongsstolen sin, og han skal vera prest der han sit på kongsstolen sin, og freds samråd skal det vera millom dei båe. /[14]

¹⁴Men krunone skal vera i Herrens tempel til minne um Helem, Tobia og Jedaja og Hen Sefaniasson.

¹⁵Og langt burtanfrå skal dei koma og byggja på Herrens tempel, og de skal få sanna at Herren, allhers Gud, hev sendt meg til dykk. Og dette skal henda dersom de høyrer på røysti åt Herren dykkar Gud.