Read nynorsk 1938 Evangeliet etter Matteus 11 Bible Online

Evangeliet etter Matteus 11 - nynorsk 1938 bible

Evangeliet etter Matteus 11

¹Då Jesus hadde sagt alt det han vilde leggja dei tolv læresveinane på minne, for han burt att og tok til å læra folk og tala for dei kring i byane.

²Johannes fekk høyra i fengslet um gjerningane åt Kristus. Då sende han bod med læresveinane sine og spurde han:

³Er du den som skal koma, eller lyt me venta ein annan?

⁴Jesus svara: Gakk og seg Johannes kva de høyrer og ser:

⁵Blinde fær syni si, og halte gjeng ikring, spillsjuke vert reine, og dauve høyrer, daude stend upp att, og fatige fær høyra evangeliet;

⁶og sæl er den som ikkje styggjest ved meg.

⁷Då dei gjekk burt, tok Jesus til å tala til folket um Johannes: Kvi gjekk de ut i øydemarki? Vilde de sjå ei røyr som svagar att og fram i vinden?

⁸Kvi gjekk de då der ut? Vilde de sjå ein mann med fine klæde? Nei, dei som gjeng i fine klæde, held til i kongsgardane.

⁹Men kvi gjekk de då der ut? Vilde de sjå ein profet? Ja, segjer eg dykk, og det ein som er meir enn profet!

¹⁰Det er um han det er skrive: Sjå, eg sender mitt bod framfyre deg; han skal rydja vegen din for deg.

¹¹Det segjer eg dykk for sant: Aldri hev det stige fram nokon større millom dei som er fødde av kvinnor, enn Johannes døyparen; og endå er den minste i himmelriket større enn han.

¹²Men frå Johannes døyparens tid og til denne stund bryt folk seg med makt inn i himmelriket, og dei som bryt seg inn, riv det til seg.

¹³For alle profetane og lovi spådde alt heilt til Johannes kom,

¹⁴og vil de tru det, so er han Elias som skal koma.

¹⁵Høyr etter, kvar som øyro hev!

¹⁶Kven skal eg likna denne ætti med? Dei likjest born som sit på torget og ropar til andre born:

¹⁷Me let i fløyta åt dykk, og de dansa ikkje; me song eit syrgjekvede, og de øya ikkje.

¹⁸For fyrst kom Johannes, og korkje åt eller drakk; då sa dei: Han må vera forgjord!

¹⁹So kom Menneskesonen; han et og drikk, og so segjer dei: Sjå for ein etar og drikkar! Han er godvener med tollmenn og syndarar! Men visdomen hev prova si rettferd med sine born.

²⁰So tok han til å lasta dei byane som han hadde gjort flest under i, for di dei ikkje hadde vendt um:

²¹Ve yver deg, Korasin! Ve yver deg, Betsaida! Hadde dei underi som eg gjorde i dykk, vore gjorde i Tyrus og Sidon, so hadde dei longe angra og havt på seg sekk og oska.

²²Men det segjer eg dykk: På domedag skal det ganga Tyrus og Sidon likare enn dykk.

²³Og du, Kapernaum, som hev vore lyft upp til himmelen, til helheimen skal du støytast ned! For hadde dei underi som er gjorde i deg, vore gjorde i Sodoma, so hadde han stade til denne dag.

²⁴Men det segjer eg dykk: På domedag skal det ganga Sodomalandet likare enn dykk.

²⁵I den same tidi tok Jesus til ords og sa: Eg lovar deg, Fader, du som råder yver himmelen og jordi, at du hev løynt dette for dei lærde og kloke, og openberra det for dei ulærde og barnslege!

²⁶Ja, Fader, for soleis tykte du det best!

²⁷Alt hev Far min gjeve i mine hender, og ingen kjenner Sonen, utan Faderen, og ingen kjenner Faderen, utan Sonen og dei som Sonen vil openberra det for.

²⁸Kom til meg, alle de som slit og hev tungt å bera! hjå meg skal de få kvila dykk ut!

²⁹Tak mitt åk på dykk, og lær av meg! for eg er mild og mjuk i hjarta; so skal de finna kvild for sjelene dykkar.

³⁰For mitt åk er godt, og mi byrd er lett.