Read nynorsk 1938 Evangeliet etter Matteus 16 Bible Online

Evangeliet etter Matteus 16 - nynorsk 1938 bible

Evangeliet etter Matteus 16

¹Då kom farisearane og saddusearane og freista han, og bad at han vilde lata dei få sjå eit teikn frå himmelen.

²Han svara: Um kvelden segjer de: Det vert godt ver; for himmelen er raud,

³og um morgonen: I dag vert det uver; for himmelen er raud og myrk. Himmelsbragdi veit de å døma um, men tidarteikni kann de ikkje tyda.

⁴Ei vond og utru ætt krev etter teikn, men dei skal ikkje få anna teikn enn Jonas-teiknet. Dermed snudde han seg ifrå dei og gjekk burt.

⁵Då dei so for yver til hi sida, gløymde læresveinane å taka brød med seg.

⁶So sa Jesus til dei: Sjå til at de tek dykk i vare for farisear- og saddusear-surdeigen!

⁷Då tenkte dei med seg: Det er av di me ikkje tok brød med oss!

⁸Jesus gådde det og sa: Kvi tenkjer de med dykk at det er av di de ikkje hev brød med, de fåtruande?

⁹Hev de endå so lite vit? Kjem de ikkje i hug dei fem brødleivane til dei fem tusund mann, og kor mange korger de fekk att,

¹⁰og ikkje dei sju leivane til dei fire tusund, og kor mange korger de då fekk att?

¹¹Kann de då ikkje skyna at det ikkje var brød eg tala til dykk um? Men akta dykk for farisear- og saddusear-surdeigen!

¹²Då skyna dei at det ikkje var surdeigen i brødet han hadde meint, men læra åt farisearane og saddusearane.

¹³Då Jesus var komen til bygdene kring Cæsarea Filippi, spurde han læresveinane sine: Kven segjer folk at Menneskesonen er?

¹⁴Dei svara: Sume segjer: Johannes døyparen, andre: Elias, endå andre: Jeremias eller ein annan av profetane.

¹⁵Kven segjer då de at eg er? spurde han.

¹⁶Då tok Simon Peter til ords og sa: Du er Messias, den levande Guds Son.

¹⁷Og Jesus sa til han: Sæl er du, Simon Jonasson! for det er ikkje kjøt og blod som hev lært deg det, men Far min i himmelen.

¹⁸Og no segjer eg deg at du er Peter; yver den steinen vil eg byggja mi kyrkja, og helheimsportane skal ikkje vinna yver henne.

¹⁹Eg vil gjeva deg lyklane til himmelriket; det som du bind på jordi, skal vera bunde i himmelen, og det som du løyser på jordi, skal vera løyst i himmelen.

²⁰So forbaud han læresveinane å segja det til nokon at han var Messias.

²¹Frå den tidi tok Jesus til å syna læresveinane at han laut fara til Jerusalem og tola mykje vondt av styresmennene og øvsteprestane og dei skriftlærde, og at dei kom til å drepa han, men tridje dagen skulde han standa upp att.

²²Peter tok han til sides og for til å telja for han og sa: Hjelpe deg Gud, Herre! Slikt må aldri henda deg!

²³Men Jesus snudde seg og sa til Peter: “Vik bak meg, Satan! Du vil føra meg til fall”.

²⁴Same gongen sa Jesus til læresveinane sine: Vil nokon vera i lag med meg, so lyt han gløyma seg sjølv og taka krossen sin upp og fylgja etter meg.

²⁵For den som vil berga livet sitt, skal missa det; men den som misser livet for mi skuld, skal finna det.

²⁶Kva batar det eit menneske um han vinn heile verdi, men taper sjeli si? Eller kva hev mennesket å gjeva i byte for sjeli si?

²⁷For Menneskesonen skal koma i herlegdomen åt Far sin med englane sine, og då skal han gjeva kvar og ein lika for det dei hev gjort.

²⁸Det segjer eg dykk for visst: Sume av dei som stend her, skal ikkje smaka dauden fyrr dei hev set Menneskesonen koma i sitt kongelege velde.