Read nynorsk 1938 Evangeliet etter Matteus 19 Bible Online

Evangeliet etter Matteus 19 - nynorsk 1938 bible

Evangeliet etter Matteus 19

¹Då Jesus hadde tala desse ordi, bar det so til at han tok ut frå Galilea og for til Judabygdene. Han la vegen gjenom landet på hi sida Jordan;

²mykje folk fylgde han der, og han lækte dei.

³Då kom farisearane til han og vilde freista han og sa: Tru ein mann hev lov til å skilja seg frå kona si, kva årsak han tykkjest hava?

⁴Han svara: Hev de ikkje lese at skaparen alt ifrå det fyrste skapte dei mann og kvinna

⁵og sa: Difor skal mannen skiljast med far sin og mor si og halda seg hjå kona si, og dei tvo skal vera eitt kjøt?

⁶So er dei då ikkje lenger tvo, men eitt kjøt, og det som Gud hev bunde i hop, det skal ikkje menneskja skilja.

⁷Dei segjer til han: Kvi sa då Moses at mannen skulde gjeva kona skilsmålsbrev og senda henne frå seg?

⁸For dykkar harde hjarto skuld gav Moses dykk lov til å skiljast frå konone dykkar, svara han; men frå det fyrste hev det ikkje vore so.

⁹Og det segjer eg dykk, at den som skil seg frå kona si for anna enn utruskap, og gifter seg med ei onnor, han gjer hor, og den som gifter seg med ei fråskild kona, han gjer hor.

¹⁰Då sa læresveinane til han: Er det den retten som gjeld millom mann og kona, då er det ikkje godt å gifta seg.

¹¹Han svara: Det er noko som ikkje alle kann læra, men berre dei som hev fenge gåva til det.

¹²For det finst gjeldingar som er fødde so av morsliv, og det finst gjeldingar som folk hev gjeldt, og det finst gjeldingar som hev gjeldt seg sjølve for himmelriket skuld. Lat dei skyna det dei som kann!

¹³So bar dei småborn til han og bad han vilde leggja hendene på dei og beda for dei. Læresveinane truga dei,

¹⁴men Jesus sa: Lat småborni vera og hindra dei ikkje å koma til meg! For himmelriket høyrer slike til.

¹⁵Og han la hendene på dei, og for so derifrå.

¹⁶Då kom det ein til han og sa: Meister, kva godt skal eg gjera so eg kann få eit æveleg liv?

¹⁷Kvi spør du meg um det som er godt? svara han. Det er berre ein som er god. Men vil du ganga inn til livet, so haldt bodi!

¹⁸Kva for bod? spurde han. Jesus svara: Desse: Du skal ikkje drepa! Du skal ikkje gjera hor! Du skal ikkje stela! Du skal ikkje vitna rangt!

¹⁹Du skal æra far din og mor di! Du skal elska næsten din som deg sjølv!

²⁰Alt det hev eg halde, segjer den unge mannen; kva er det då som vantar meg?

²¹Jesus svara: Vil du vera fullkomen, so tak og sel det du eig, og gjev det til dei fatige! då skal du få ein skatt i himmelen; og kom so og fylg meg!

²²Då den unge mannen høyrde det, vart han ille ved og gjekk burt; for han hadde mykje gods.

²³Då sa Jesus til læresveinane sine: Det segjer eg dykk for sant: Det er vandt for ein rik å koma inn i himmelriket.

²⁴Ja, eg segjer dykk: Ein kamel kjem lettare gjenom eit nålauga enn ein rik kjem inn i Guds rike.

²⁵Då læresveinane høyrde det, vart dei reint forfærde og sa: Kven kann då verta frelst?

²⁶Jesus såg på dei og sa: For menneske er det umogeleg; men for Gud er alt mogeleg.

²⁷Då tok Peter til ords og sa til han: Sjå, me hev gjeve ifrå oss alt og fylgt deg; kva skal då me få?

²⁸Og Jesus svara: Det segjer eg dykk for sant: Når alt vert nytt, og Menneskesonen sit i sin glimande kongsstol, då skal de og, som hev fylgt meg, sitja i tolv høgsæte og styra dei tolv Israels-ættene.

²⁹Og kvar som hev skilt seg med hus eller brør eller syster eller far eller mor eller born eller gardar for mitt namn skuld, han skal få det att mange gonger og erva eit æveleg liv.

³⁰Men mange av dei fyrste skal vera dei siste, og mange av dei siste dei fyrste.