Read nynorsk 1938 Evangeliet etter Markus 15 Bible Online

Evangeliet etter Markus 15 - nynorsk 1938 bible

Evangeliet etter Markus 15

¹Det tok alt til å dagast då øvsteprestane med styresmennene og dei skriftlærde - heile Rådet - var ferdige med rådleggjingi si. Då batt dei Jesus og førde han burt og gav han yver til Pilatus.

²Pilatus spurde han: Er du kongen yver jødane? - Du segjer det sjølv, svara Jesus.

³Øvsteprestane kom med mange klagemål mot han.

⁴Då spurde Pilatus han att: Svarar du ingen ting? Høyr alt det dei klagar deg for!

⁵Men Jesus svara ikkje eit ord meir, so Pilatus tok til å undrast.

⁶Kvar høgtid gav Pilatus dei ein fange fri, den som dei sjølve bad um.

⁷Og ein som heitte Barabbas sat då fengsla i hop med nokre ufredsmenn; Dei hadde gjort eit upplaup og drepe nokon.

⁸So kom folket upp og tok til å beda um det som Pilatus var van med å gjera for dei.

⁹Då svara han dei: Vil de eg skal gjeva dykk jødekongen fri?

¹⁰For han skyna det var av ovund øvsteprestane hadde gjeve Jesus yver til han.

¹¹Men øvsteprestane fekk eggja upp folket, so dei bad at han heller skulde gjeva dei Barabbas fri.

¹²Då tok Pilatus til ords att og sa: Kva vil de då eg skal gjera med han som de kallar kongen yver jødane?

¹³Dei svara med å ropa: Krossfest han!

¹⁴Kva vondt hev han då gjort? sa Pilatus. Men dei ropa berre endå sterkare: Krossfest han!

¹⁵Pilatus vilde gjerne gjera folket til lags. Han gav dei Barabbas fri, men Jesus let han hudflettast og gav han yver til hermennene sine, so dei skulde krossfesta han.

¹⁶Hermennene førde Jesus inn i garden, i borgi, og kalla i hop heile vakti.

¹⁷Dei klædde han i ei purpurkåpa, og sette på han ein klungerkrans som dei hadde fletta,

¹⁸og tok til å helsa han: Heil deg, jødekonge!

¹⁹So slo dei han i hovudet med ein røyrstav og sputta på han og la seg på kne og hyllte han.

²⁰Då dei hadde spotta han som dei vilde, klædde dei av han purpurkåpa og hadde på han hans eigne klæde, og so leidde dei han ut og skulde krossfesta han.

²¹Då gjekk det ein mann framum, som kom frå marki; det var Simon frå Kyrene, far åt Aleksander og Rufus; honom nøydde dei til å bera krossen hans.

²²Dei førde han til den staden som heiter Golgata - det er det same som Skallestaden -.

²³Der baud dei han vin med myrra i; men han vilde ikkje hava det.

²⁴So feste dei han til krossen. Klædi hans skifte dei millom seg, og kasta lut um kva kvar skulde hava.

²⁵Det var i den tridje timen dei krossfeste han.

²⁶På krossen var det sett ei innskrift som nemnde skuldi hans; ho lydde so: Kongen yver jødane.

²⁷Saman med han krossfeste dei tvo røvarar, ein på hans høgre og ein på hans vinstre sida;

²⁸og då sannast det skriftordet som segjer: Og han vart rekna millom brotsmenn.

²⁹Dei som gjekk framum, hædde han og riste på hovudet og sa: Å, du som riv ned templet og byggjer det upp att på tri dagar!

³⁰Hjelp deg no sjølv og stig ned av krossen!

³¹Sameleis spotta øvsteprestane og, både dei og dei skriftlærde, og sa seg imillom: Andre hev han hjelpt, seg sjølv kann han ikkje hjelpa!

³²Lat no Messias, Israels konge, stiga ned av krossen, so me kann sjå det og tru! Dei som var krossfeste med han, gav seg og til å spotta han.

³³Då den sette timen var komen, vart det myrkt yver heile landet alt til den niande timen.

³⁴Og i den niande timen ropa Jesus med høg røyst: Elo'i, Elo'i, lama sabaktani? Det er: Min Gud, min Gud, kvi hev du forlate meg?

³⁵Nokre av dei som stod der, sa då dei høyrde det: No ropar han på Elias!

³⁶Då sprang det ein fram, duppa ein svamp i vineddik, sette han på ei tein og let Jesus få drikka og sa: Venta! Lat oss sjå um Elias kjem og tek han ned!

³⁷Og Jesus gav ifrå seg eit høgt rop og andast.

³⁸Då rivna forhenget i templet midt i tvo, ovantil og radt ned.

³⁹Og då hovudsmannen, som stod der midt framfor han, såg at han andast med eit sovore rop, sa han: Den mannen var visst og sant Guds Son!

⁴⁰Det var og nokre kvinnor der, som stod eit stykke undan og såg på. Millom dei var Maria Magdalena, og Maria, mor åt Jakob den yngre og Joses, og Salome,

⁴¹som alle hadde fylgt han medan han var i Galilea, og tent han, og mange andre kvinnor som hadde vore med han upp til Jerusalem.

⁴²Det var då fyrebuingsdagen eller dagen fyre sabbaten, og då det leid alt mot kvelden,

⁴³kom Josef frå Arimatea, ein gjæv rådsherre, som og venta på Guds rike; han våga seg til å ganga inn til Pilatus og beda um lekamen åt Jesus.

⁴⁴Pilatus undrast på um han alt var slokna;

⁴⁵han kalla hovudsmannen til seg og spurde um Jesus nyst var slokna, og då han hadde fenge vissa um det av hovudsmannen, let han Josef få liket.

⁴⁶So kjøpte Josef fint linty og tok han ned, sveipte han i lintyet og la han i ei grav som var hoggi ut i berget, og so velte han ein stein attfor gravopningi.

⁴⁷Og Maria Magdalena og Maria, mor åt Joses, såg staden der han vart lagd.