Read nynorsk 1938 Evangeliet etter Lukas 21 Bible Online

Evangeliet etter Lukas 21 - nynorsk 1938 bible

Evangeliet etter Lukas 21

¹Då han såg upp, vart han var at dei rike la gåvone sine i templekista;

²og han vart var ei armodsleg enkja, som la tvo skjervar.

³Då sa han: Det segjer eg dykk for sant: Denne fatige enkja hev lagt meir enn dei alle.

⁴For det som desse gav, det gav dei alle av nøgdi si; men ho gav av si fatige råd - gav alt ho hadde til å livberga seg med.

⁵Det var nokre som tala um templet, at det var prydt med fagre steinar og vigde gåvor. Då sa han:

⁶Dette som de skodar, um det skal de vita at det vil koma ei tid då her ikkje vert liggjande stein på stein som ikkje skal rivast laus.

⁷Når skal då dette ganga fyre seg, meister? spurde dei, og kva er teiknet på at den tidi er nær?

⁸Då svara han: Sjå dykk fyre, so ingen fær ført dykk på villstig! For mange skal taka mitt namn og segja: Det er eg! og: Det lid innpå tidi. Fylg ikkje etter dei!

⁹Og når de høyrer um ufred og upprør, so vert ikkje fælne! For fyrst lyt det henda; men enden kjem ikkje straks.

¹⁰So sa han til dei: Folk skal reisa seg imot folk, og rike mot rike;

¹¹store jordskjelvar skal koma, og uår og sott kring i landi; og det skal syna seg skræmor og store teikn frå himmelen.

¹²Men fyrr alt dette hender, skal dei leggja hand på dykk og forfylgja dykk og draga dykk inn i synagogor og fangehus; og de skal førast fram for kongar og landshovdingar for mitt namn skuld.

¹³Det skal venda seg til godt vitnemål for dykk.

¹⁴Legg dykk då på minne at de ikkje fyreåt tarv tenkja på korleis de skal svara for dykk!

¹⁵Eg skal gjeva dykk munn og visdom som ingen av motmennene dykkar skal kunna standa seg for eller segja imot.

¹⁶Jamvel foreldre og brør og skyldfolk og vener skal svika dykk og valda sume av dykk dauden,

¹⁷og alle skal hata dykk for mitt namn skuld.

¹⁸Men ikkje eit hår på hovudet dykkar skal forkomast.

¹⁹Haldt ut, so skal de vinna sjelene dykkar!

²⁰Når de ser at stridsherar kringset Jerusalem, då skal de vita at det ikkje er lenge fyrr byen vert lagd i øyde.

²¹Då lyt dei som er i Judaland, røma til fjells; dei som er inni byen, lyt flytja ut, og dei som er utpå landet, må ikkje koma inn.

²²For dette er hemnardagane; då skal det ganga fram alt det som stend skrive.

²³Stakkars dei som gjeng med barn eller gjev brjost, i dei dagane! For det skal vera stor naud på jordi, og vreide yver dette folket.

²⁴Dei skal falla for sverds-eggi og førast hertekne burt til alle heidningfolk, og Jerusalem skal heidningane trøda under fot, til tidi åt heidningane er ute.

²⁵Det skal syna seg teikn i sol og måne og stjernor, og på jordi skal folki fælast i vonløysa når havet og brotsjøane dyn.

²⁶Folk skal uvita av redsla og gru for det som kjem yver jordriket; for himmelkraftene skal skakast.

²⁷Då skal dei sjå Menneskesonen koma i skyi med velde og stor herlegdom.

²⁸Men når dette tek til å henda, då rett dykk upp og lyft hovudet! for det lid mot utløysingi dykkar.

²⁹So sa han dei ei likning: Sjå på fiketreet og alle andre tre!

³⁰So snart de ser dei hev sprotte, då veit de av dykk sjølve at no er sumaren nær.

³¹Soleis når de ser dette hender, då veit de at Guds rike er nær.

³²Det segjer eg dykk for visst: Denne ætti skal ikkje forgangast fyrr alt saman hev hendt.

³³Himmel og jord skal forgangast, men mine ord skal aldri forgangast.

³⁴Men vara dykk at de aldri let hjarta tyngjast av rus og ovdrykk og verdsleg sut, so den dagen kjem uventande på dykk som ei snara!

³⁵For han skal koma yver alle som bur kring i vidande verdi.

³⁶Vak kvar tid og stund, og bed, so de kann få styrke til å røma undan alt dette som koma skal, og standa dykk framfor Menneskesonen!

³⁷Um dagane lærde han i templet; men um nætene gjekk han ut or byen og heldt til på den åsen dei kallar Oljeberget.

³⁸Og alt folket kom tidleg um morgonen til han i templet og lydde på han.