Read nynorsk 1938 Evangeliet etter Lukas 3 Bible Online

Evangeliet etter Lukas 3 - nynorsk 1938 bible

Evangeliet etter Lukas 3

¹I det femtande styringsåret åt keisar Tiberius, medan Pontius Pilatus var landshovding i Judea, og Herodes fylkeskonge i Galilea, og Filip, bror hans, fylkeskonge i Iturea- og Trakonitislandet, og Lysanias fylkeskonge i Abilene,

²og medan Annas og Kaifas var øvsteprestar, kom Guds ord til Johannes, son åt Sakarias, i øydemarki.

³Då for han kring i heile Jordankverven og ropa ut umvendings-dåp til forlating for syndene,

⁴som skrive stend i boki som inneheld talane åt Esaias, profeten: Høyr han som ropar i heidi: Ryd vegen åt Herren, jamna stigane hans!

⁵Kvart djuv skal fyllast, kvart fjell skal lægjast, og kvar ein haug; det krokute skal verta beint, og dei staupute vegane verta slette,

⁶og alt kjøt skal sjå Guds frelsa.

⁷Som no folket kom ut og vilde få han til å døypa seg, sa han til dei: Orme-ungar, kven lærde dykk å røma frå vreiden som skal koma?

⁸Ber då frukter som svarar til umvendingi, og gjev dykk ikkje til å tenkja som so: Me hev Abraham til far! for eg segjer dykk at Gud kann vekkja upp born åt Abraham av desse steinane.

⁹Øksi ligg og alt innmed roti på trei; kvart tre som ikkje ber god frukt, vert hogge ned og kasta på elden.

¹⁰Kva skal me då gjera? spurde folket.

¹¹Han svara dei: Den som hev tvo trøyor, skal gjeva ei av dei til den som ingi hev, og den som hev mat, skal gjera sameleis.

¹²Det kom og nokre tollmenn som vilde døypast, og sa: Meister, kva skal me gjera?

¹³Krev ikkje meir enn de er fyresagde! svara han.

¹⁴Like eins var det nokre hermenn som spurde han: Og me, kva skal me gjera? Då svara han: De skal ikkje truga pengar utav folk anten med vald eller falske klagemål! De skal nøgja dykk med løni dykkar!

¹⁵Men folket gjekk i venting, og alle tenkte med seg: Tru Johannes skulde vera Messias.

¹⁶Då tok han til ords og sa til alle: Eg døyper dykk med vatn; men det kjem ein som er sterkare enn eg - eg er ikkje verdig å løysa skobandet hans; han skal døypa dykk med den Heilage Ande og eld.

¹⁷Han hev kasteskovli i handi, og skal gjera av låven sin og samla kornet i stabburet sitt; men agnene skal han brenna i ein eld som aldri sloknar.

¹⁸Dette og mykje anna la han folket på hjarta, og kunngjorde evangeliet åt dei.

¹⁹Men då han tala til Herodes, fylkeskongen, for giftarmålet med Herodias, brorkona hans, og for alt det vonde han hadde gjort,

²⁰so gjorde Herodes det og attpå alt, at han sette Johannes i fengsel.

²¹Då no alt folket vart døypt, og Jesus og vart døypt, då hende det, medan han bad, at himmelen opna seg,

²²og den Heilage Ande dala ned yver han i duveham, og det kom ei røyst frå himmelen: Du er Son min, som eg elskar; deg hev eg hugnad i.

²³Jesus var um lag tretti år då han stod fram, og var, etter som dei meinte, son åt Josef, son åt Eli,

²⁴son åt Mattat, son åt Levi, son åt Melki, son åt Jannai, son åt Josef,

²⁵son åt Mattatias, son åt Amos, son åt Nahum, son åt Esli, son åt Naggai,

²⁶son åt Ma'at, son åt Mattatias, son åt Sime'i, son åt Josek, son åt Joda,

²⁷son åt Johanan, son åt Resa, son åt Serubabel, son åt Salatiel, son åt Neri,

²⁸son åt Melki, son åt Addi, son åt Kosam, son åt Elmadam, son åt Er,

²⁹son åt Josva, son åt Elieser, son åt Jorim, son åt Mattat, son åt Levi,

³⁰son åt Simeon, son åt Juda, son åt Josef, son åt Jonam, son åt Eljakim,

³¹son åt Melea, son åt Menna, son åt Mattata, son åt Natan, son åt David,

³²son åt Isai, son åt Obed, son åt Boas, son åt Salmon, son åt Nahson,

³³son åt Aminadab, son åt Ram, son åt Hesron, son åt Peres, son åt Juda,

³⁴son åt Jakob, son åt Isak, son åt Abraham, son åt Tarah, son åt Nakor,

³⁵son åt Serug, son åt Re'u, son åt Peleg, son åt Eber, son åt Salah,

³⁶son åt Kenan, son åt Arpaksad, son åt Sem, son åt Noah, son åt Lamek,

³⁷son åt Metusalah, son åt Enok, son åt Jared, son åt Malalael, son åt Kenan,

³⁸son åt Enos, son åt Set, son åt Adam, Guds son.