Read nynorsk 1938 Femte Mosebok 13 Bible Online

Femte Mosebok 13 - nynorsk 1938 bible

Femte Mosebok 13

¹Når det stig fram ein profet millom dykk, eller ein som hev draumsyner, og han spår deg eit teikn eller under

²og segjer: Lat oss fylgja andre gudar - gudar som du ikkje kjenner - og dyrka dei! og det hender, det som han spådde,

³so lyd ikkje etter kva slik ein profet eller draumsjåar segjer; for Herren dykkar Gud vil berre røyna dykk og sjå um de elskar han av alt dykkar hjarta og all dykkar hug.

⁴Herren dykkar Gud skal de fylgja, og han skal de ottast; hans bod skal de akta på, og hans ord skal de høyra; han skal de tena, og han skal de halda dykk til.

⁵Og denne profeten eller draumsjåaren skal lata livet, for di han talde dykk til å falla frå Herren dykkar Gud, som førde dykk ut or Egyptarlandet og fria deg ut or slavehuset, og for di han vilde lokka deg burt frå den vegen som Herren din Gud hev sagt du skal ganga. Soleis skal du rydja det vonde ut or lyden.

⁶Um bror din, son åt di eigi mor, eller son din eller dotter di eller kona di som du held i fanget, eller venen din, som du hev so kjær som di eigi sjel - um nokon av desse lokkar deg i løynd og segjer: Lat oss ganga av og dyrka andre gudar! - gudar som du ikkje kjenner, og federne dine aldri hev kjent,

⁷ein av gudane åt dei folki som bur rundt ikring dykk, tett innmed eller langt undan, frå den eine enden av jordi til hin -

⁸so skal du ikkje fara etter han og ikkje høyra på han; du skal ikkje spara han og ikkje tykkja synd i han og ikkje dylja brotet hans,

⁹men du skal drepa han; sjølv skal du vera den fyrste som lyfter handi mot han, og sidan skal heile folket gjera det same.

¹⁰Du skal steina han i hel, for di han freista å lokka deg burt frå Herren din Gud, som førde deg utor Egyptarlandet, or slavehuset.

¹¹Og heile Israel skal høyra det og reddast, so dei aldri meir vert gjort so stygg ei synd millom dykk.

¹²Høyrer du dei segjer um nokon av dei byane som Herren din Gud gjev deg til å bu i:

¹³Det hev stige fram gudlause menner millom dykk, og dei hev fenge folket i byen sin til å dyrka andre gudar - gudar som de ikkje kjenner -

¹⁴so skal du granska og røkja etter og spyrja deg vel fyre, og syner det seg då å vera sant, er det visst og vitnefast at det hev vore gjort slikt skjemdarverk hjå dykk,

¹⁵so skal du bannstøyta den byen han og alt som i han er, og hogga ned både folk og fe.

¹⁶Alt herfanget du tek der, skal du samla i hop midt på torget, og brenna upp både det og byen til eit heiloffer åt Herren din Gud, og sidan skal byen for alle tider vera ein grushaug og må aldri byggjast upp att.

¹⁷Du må ikkje halda att noko av det som er bannstøytt; då skal Herren stagga sin brennande vreide og gjeva deg nåde og syna deg miskunn og auka ætti di, som han lova federne dine -

¹⁸so sant du lyder Herren din Gud og aktar på alle bodi hans, dei som eg ber fram for deg i dag, og gjer det som rett er i hans augo.