Read nynorsk 1938 Femte Mosebok 19 Bible Online

Femte Mosebok 19 - nynorsk 1938 bible

Femte Mosebok 19

¹Når Herren din Gud hev rudt ut alle folk i det landet han gjev deg, og du hev drive dei ut og bur i byane og husi deira,

²so skal du skilja ut tri byar i det landet som Herren din Gud hev gjeve deg til eiga.

³Du skal setja vegen dit godt i stand og skifta heile det landet Herren din Gud hev gjeve deg til odel og eiga, i tri luter, so dei fredlause kann få røma dit.

⁴Det er den som uviljande hev drepe nokon og ikkje bar hat til han frå fyrr, som skal få røma dit og då vera trygg for livet sitt -

⁵som når ein gjeng med næsten sin ut i skogen og skal hogga timber, og han svingar øksi og vil fella eit tre, men øksi fer av skaftet og råkar næsten hans so han døyr, då kann han røma til ein av desse byane og vera trygg for livet.

⁶For blodhemnaren kunde i sin heite harm setja etter dråpsmannen, og var vegen lang, kunde han nå han att og slå han i hel, endå han ikkje var skuldig til å døy, sidan han ikkje hadde bore hat til den han drap.

⁷Difor er det eg segjer til deg at du skal skilja ut tri byar.

⁸Og når Herren din Gud vidkar ut riket ditt, som han lova federne dine, og gjev deg heile det landet han tala um å gjeva dei -

⁹so framt du då aktar vel på å halda alle desse bodi som eg gjev deg i dag, so du elskar Herren din Gud og alle dagar gjeng på hans vegar - då skal du leggja endå tri byar attåt desse tri;

¹⁰for det må ikkje renna uskuldigt blod i det landet Herren din Gud gjev deg til odel og eiga, so du fær blodskuld yver deg.

¹¹Men hev ein mann lagt hat til næsten sin og lurer seg innpå han og slær han til ulivs og so rømer til ein av desse byane,

¹²då skal styresmennene i byen hans senda folk og henta han heim att og gjeva han i hendene på blodhemnaren, og han skal lata livet.

¹³Du skal ikkje spara han, men reinsa Israel for blodskuldi, so sant du vil det skal ganga deg vel.

¹⁴Du skal ikkje flytja merkesteinane millom deg og grannen din, dei som dei gamle hev sett kring den jordi du fær til odel og eiga i det landet Herren din Gud gjev deg.

¹⁵Eitt vitne er ikkje nok til å fella ein mann som er skulda for eit brot eller ei synd, kva det so er for ei synd han kann hava gjort. Tvo eller tri manns vitnemål skal det til fyrr det kann dømast i ei sak.

¹⁶Når det kjem fram eit vondkynt vitne og skuldar ein mann for lovbrot,

¹⁷so skal båe tvo møtast for Herrens åsyn, for dei prestane og domarane som då er;

¹⁸og domarane skal granska saki vel. Syner det seg då at vitnet er ein ljugar og hev vitna rangt mot bror sin,

¹⁹so skal de gjera det same med han som han hadde tenkt å gjera med bror sin. Soleis skal de rydja ut det vonde ut or lyden.

²⁰Og dei andre skal høyra det og reddast, so det aldri meir vert gjort slik ei ugjerning millom dykk.

²¹Du skal ingen spara: Liv for liv, auga for auga, tonn for tonn, hand for hand, fot for fot.