Read nynorsk 1938 Femte Mosebok 23 Bible Online

Femte Mosebok 23 - nynorsk 1938 bible

Femte Mosebok 23

¹Den som er klakka eller skoren på blygsli, må ikkje vera med i Herrens lyd.

²Den som er fødd i hor, må ikkje vera med i Herrens lyd; jamvel etterkomarane hans radt til tiande leden skal vera utestengde frå Herrens lyd.

³Ein ammonit eller moabit må ikkje vera med i Herrens lyd; jamvel etterkomarane deira radt til tiande leden skal allstødt vera utestengde frå Herrens lyd,

⁴for di dei ikkje møtte dykk ikkje på vegen med brød og vatn då de kom frå Egyptarland, og for di han leigde Bileam, son åt Beor, frå Petor i Mesopotamia til å banna deg. /[8]

⁵Men Herren din Gud vilde ikkje høyra på Bileam; han vende forbanningi um til velsigning for deg, av di han hadde deg kjær.

⁶Aldri i dine levedagar skal du syta for deira velferd og lukka.

⁷Edomitane skal du ikkje hava stygg til; for dei er brørne dine. Egyptarane skal du heller ikkje hava stygg til; for du hev havt tilhald i landet deira.

⁸Etterkomarane deira i tridje leden kann få vera med i Herrens lyd.

⁹Når du tek ut i strid mot fiendane dine og slær læger, so skal du akta deg for alt som er usømeleg.

¹⁰Er ein av dykk urein etter noko som hev hendt han um natti so skal han ganga ut or lægret og må ikkje koma inn att

¹¹fyrr det lid mot kvelden; då skal han laugs seg, og når soli glader, kann han koma inn i lægret.

¹²Utanfor lægret skal du hava ein stad som ligg for seg sjølv; dit skal du ganga dine ærender.

¹³Og millom tølone dine skal du hava ein spade; med den skal du grava attyver det som kjem ifrå deg når du sit der ute.

¹⁴For Herren din Gud er med deg i lægret; han vil hjelpa deg og gjeva fiendane i di makt; difor skal lægret ditt vera heilagt; han må ikkje sjå noko ufyse der; for då vender han ryggen til og gjeng ifrå deg.

¹⁵Ein træl som hev rømt frå herren sin og tydt seg til deg, skal du ikkje senda han attende til herren hans.

¹⁶Lat han få bu kvar han vil i landet ditt, i ein av byane dine, der han likar seg best, og ver ikkje hard imot han!

¹⁷Det må ikkje finnast møy eller svein i Israel som vigjer seg til skjøkjelivnad. /[9]

¹⁸Kom ikkje med skjøkjeløn eller tevepengar inn i huset åt Herren din Gud, um du so skulle hava lova sovore! For alle slike pengar er ein styggedom for Herren din Gud.

¹⁹Du skal ikkje taka renta av bror din, korkje for pengar eller matvaror eller noko anna som dei tek renta for.

²⁰Ein utlending kann du taka renta av, men av bror din må du ikkje taka renta; då skal Herren din Gud velsigna deg i alt du tek deg fyre i det landet du kjem inn i og skal taka i eige.

²¹Når du gjer ein lovnad til Herren din Gud, so må du ikkje drygja med å halda det du hev lova; for Herren din Gud kjem til å krevja det etter deg, og då fær du synd på deg.

²²Men um du let vera å gjera nokon lovnad, so fær du ingi synd på deg for det.

²³Ordet du hev gjeve, det skal du koma i hug og halda, soleis som du av fri vilje og med din eigen munn hev lova Herren din Gud.

²⁴Kjem du inn i annan manns vinhage, so kann du eta druvor, so mykje du vil, til du er nøgd; men du må ikkje sanka i kopp.

²⁵Kjem du inn i annan manns åker, so kann du taka aks med handi; men med sigd må du ikkje koma med i annan manns åker.