Read nynorsk 1938 Femte Mosebok 25 Bible Online

Femte Mosebok 25 - nynorsk 1938 bible

Femte Mosebok 25

¹Når folk som ligg i tretta med kvarandre, møter fram for retten og fær dom i saki, so skal den som hev rett, få retten sin, og den som hev urett, verta felt.

²Lyder domen so at den som hev urett, skal hava hogg, so skal dei leggja han ned, og domaren skal sjå på at dei gjev han so mange slag som svarar til brotet han hev gjort.

³Fyrti slag kann dei slå han, ikkje fleire; for gjev dei han mange fleire slag, vert bror din ærelaus for deg.

⁴Du skal ikkje setja muleband på ein ukse som du treskjer med.

⁵Når brør bur i hop, og ein av dei døyr sonlaus, då må ikkje enkja etter den avlidne gifta seg ut or ætti, og taka ein framand til mann; men verbror hennar skal ganga inn til henne og taka henne til kona og bu i hop med henne i staden for bror sin.

⁶Og den fyrste sonen ho fær, skal kallast for son åt den avlidne broren, so ikkje namnet hans skal døy ut i Israel.

⁷Men hev ikkje verbroren hug til å gifta seg med enkja, so skal ho ganga fram på tinget for styresmennene og segja: Verbror min neittar å reisa upp eit namn åt bror sin i Israel; han vil ikkje gifta seg med meg i staden for bror sin.

⁸Då skal styresmennene i byen hans kalla han fyre seg og telja for han; og stend han endå på sitt og segjer: Eg hev ikkje hug til å gifta meg med henne,

⁹so skal brorkona ganga burt til han so styresmennene ser på det, og draga skoen av foten hans og sputta han i andletet og segja desse ordi: So skal ein fara åt med den som ikkje vil byggja upp att huset åt bror sin.

¹⁰Og sidan skal dei i Israel kalla ætti hans berrføtt-ætti.

¹¹Når menner ry i hop og slæst, og kona åt ein av dei spring burtåt og vil hjelpa mannen sin, og so retter ut handi og grip den som slær han, i blygsli,

¹²då skal du hogga av henne handi og ikkje spara henne.

¹³Du skal ikkje hava tvo slag vektlodd i taska di, eit større og eit mindre.

¹⁴Du skal heller ikkje hava tvo slag efa i huset ditt, ein større og ein mindre.

¹⁵Heile og rette vektlodd og heil og rett efa skal du hava. Då skal du få leva lenge i det landet som Herren din Gud gjev deg.

¹⁶For alle som gjer sovore, alle som gjer urett, er ein styggedom for Herren din Gud.

¹⁷Kom i hug korleis Amalek for åt med deg då de var på ferdi frå Egyptarland,

¹⁸korleis han kom imot deg på vegen medan du var trøytt og mod, og hogg ned alle dei som for attarst i heren din, alle dei som var veike og hadde gjeve seg etter; so lite ottast han Gud!

¹⁹Og når Herren din Gud gjev deg fred for alle fiendane dine rundt ikring i det landet han gjev deg til odel og eiga, då skal du rydja ut minnet um Amalek, so det ikkje finst meir under himmelen. Gløym ikkje det!