Read nynorsk 1938 Femte Mosebok 3 Bible Online

Femte Mosebok 3 - nynorsk 1938 bible

Femte Mosebok 3

¹So tok me på ei onnor leid og for uppover på vegen til Basan, og Og, kongen i Basan, kom imot oss til Edre'i med alt herfolket sitt og baud ufred.

²Men Herren sa til meg: Du tarv ikkje vera redd han. Eg gjev han i dine hender med alt folket og landet hans, og du skal gjera med han som du gjorde med Sihon, kongen yver amoritane, som budde i Hesbon.

³So gav Herren vår Gud Basan-kongen Og i våre hender, både han og alt folket hans, og me hogg dei ned, so ingen vart att eller slapp undan.

⁴Den gongen tok me alle byane hans - det fanst ikkje ein by utan me tok han frå dei - seksti byar, heile Argoblandet, riket åt Og i Basan.

⁵Alle desse var faste borger med høge murar og doble portar med slå fyre. Umfram dei tok me og ei stor mengd med landsbyar.

⁶Me bannstøytte dei, som me hadde gjort med Sihon, kongen i Hesbon; kvar einaste by bannstøytte me, både menner, kvinnor og born.

⁷Men alt bufeet og herfanget i byane eigna me til oss.

⁸Soleis tok me den gongen landet frå båe amoritarkongane på denne sida av Jordan, alt ifrå Arnonåi til Hermonfjellet /[2]

⁹- det er det som sidonitane kallar Sirjon og amoritane Senir -

¹⁰alle byane på sletta og heile Gilead og heile Basan radt til Salka og Edre'i, tvo byar i riket åt Og i Basan.

¹¹For Og, kongen i Basan, var den siste som var att av refa'itane; sengi hans stend, som alle veit, i Rabba, hovudstaden åt ammonitane; ho er av jarn og er ni alner lang og fire alner breid etter vanleg alnemål.

¹²Dette landet la me under oss då: Bygdene nordanfor Aroer, som ligg innmed Arnonåi, og helvti av Gileadfjelli med byane som der var, let eg rubenitane og gaditane få.

¹³Og det som var att av Gilead og heile Basan, riket åt Og, heile Argoblandet, gav eg til den halve Manasse-ætti. Heile dette Basanriket kallar dei refa'itlandet.

¹⁴Ja'ir, son åt Manasse, tok heile Argoblandet radt til bytet mot gesuritane og ma'akatitane; desse bygdene, Basanbygdene, gav han namn etter seg sjølv, og sidan hev folk kalla dei Ja'irsbygdene, alt til denne dag.

¹⁵Gilead let eg Makir få,

¹⁶og rubenitane og gaditane gav eg landet frå Gilead til Arnonåi, til midt i åi, og landet langs med den, og til Jabbokåi, som er landskilet mot Ammons-borni,

¹⁷og moane og Jordanåi og landet langs med den, frå Kinneret til Moavatnet - det som dei kallar Saltsjøen - nedunder Pisgalidene, på austsida.

¹⁸Den gongen var det eg sa til dykk: Dette landet hev Herren dykkar Gud gjeve dykk til eigedom. No lyt de fara fram stridsbudde fyre dei andre Israels-borni, so mange av dykk som er våpnføre,

¹⁹og berre konone og borni dykkar og bufeet - for eg veit de hev mykje bufe - skal vera att i byane som eg hev gjeve dykk;

²⁰men når Herren hev late brørne dykkar koma til ro liksom de, og dei og hev lagt under seg det landet som Herren dykkar Gud gjev dei på hi sida Jordan, då kann de fara heim att, kvar til den eigedomen, som eg hev gjeve dykk.

²¹Same gongen sa eg til Josva: Du såg sjølv kva Herren dykkar Gud gjorde med desse tvo kongane; so vil Herren gjera med alle dei riki du fer yver til.

²²De tarv ikkje reddast dei; for Herren dykkar Gud vil sjølv strida for dykk.

²³For same gongen bad eg so vent til Herren og sa:

²⁴Herre, Herre! Du hev alt synt tenaren din so mykje av din storleik og di makt; for kvar finst det ein gud i himmelen eller på jordi som kann gjera slike storverk og under som du?

²⁵Å lat meg få koma yver og sjå det gilde landet på hi sida åt Jordan, dette gilde fjell-landet og Libanon!

²⁶Men Herren var harm på meg for dykkar skuld; han vilde ikkje høyra på meg og sa: No lyt det vara nok! Tala ikkje um det til meg meir!

²⁷Stig upp på Pisgatinden og vend augo dine mot vest og mot nord og mot sud og mot aust, og sjå vidt ikring deg! For denne Jordanåi kjem du aldri yver.

²⁸So skal du segja Josva fyre og styrkja og stålsetja han; for han skal føra dette folket yver og hjelpa dei til å vinna det landet du fær sjå.

²⁹So la me oss til i dalen, midt for Bet-Peor.