Read nynorsk 1938 Evangeliet etter Johannes 13 Bible Online

Evangeliet etter Johannes 13 - nynorsk 1938 bible

Evangeliet etter Johannes 13

¹Det var straks fyre påskehøgtidi: Jesus visste at hans time var komen då han skulde fara burt frå denne verdi og heim til Faderen, og som han hadde elska sine eigne, som var i verdi, so elska han dei til enden.

²Då dei heldt kveldverd, og djevelen alt hadde skote det i hugen på Judas Simonsson Iskariot at han skulde svika han,

³og då Jesus visste at Faderen hadde gjeve alt i hans hender, og at han var komen frå Gud og gjekk til Gud,

⁴so reiser han seg frå bordet og legg av seg kjolen og tek eit handklæde og bind um seg;

⁵so slær han vatn i vaskefatet og tok til å två føtene åt læresveinane og turka dei med linklædet som han hadde bunde kring livet.

⁶Han kjem til Simon Peter, og han segjer til han: Herre, tvær du mine føter?

⁷Jesus svara han so: Kva det er eg gjer, veit du ikkje no, men du skal skyna det sidan.

⁸Aldri i verdi skal du två mine føter, segjer Peter. Dersom eg ikkje tvær deg, hev du ingen ting i hop med meg, svara Jesus.

⁹Simon Peter segjer til han: Herre, ikkje berre føtene, men hendene og hovudet med!

¹⁰Den som hev lauga seg, treng ikkje två anna enn føtene; elles er han heiltupp rein, segjer Jesus; og de er reine, men ikkje alle.

¹¹Han visste kven som skulde svika han; difor var det han sa: De er ikkje reine alle.

¹²Då han no hadde tvege føtene deira og teke på seg kjolen sin og sett seg til bords att, sa han til dei: Skynar de kva det er eg hev gjort med dykk?

¹³De kallar meg meister og herre, og det med rette, for det er eg.

¹⁴Hev no eg, herren og meisteren, tvege føtene dykkar, so hev de og den skyldnaden at de skal två føtene åt kvarandre.

¹⁵Det er eit mynster eg hev synt dykk; som eg gjorde med dykk, so skal de og gjera.

¹⁶Det segjer eg dykk for visst og sant: Ein tenar er ikkje større enn herren sin, og ein ærendsvein er ikkje større enn den som hev sendt han.

¹⁷Veit de det, so er de sæle, so sant de gjer etter det.

¹⁸Eg talar ikkje um dykk alle; eg veit kven eg valde ut; men det var so Skrifti skulde sannast: Den som et sitt brød med meg, hev lyft sin hæl imot meg.

¹⁹Eg segjer dykk det alt no, fyrr det hev hendt, so de, når det hender, skal tru at eg er den eg er.

²⁰Det segjer eg dykk for visst og sant: Den som tek imot ein eg sender, tek imot meg, og den som tek imot meg, tek imot den som sende meg.

²¹Då Jesus hadde sagt det, vart han uppøst i åndi og sa sterkt og ålvorsamt: Det segjer eg dykk for visst og sant: Ein av dykk kjem til å svika meg!

²²Læresveinane såg på kvarandre og kunde ikkje skyna kven det var han meinte.

²³Ein av læresveinane - den som Jesus elska - sat ved høgre sida hans.

²⁴Honom gjer Simon Peter eit teikn til, og segjer til han: Seg kven han meiner!

²⁵Han bøygde seg då næmare innåt Jesus og segjer til han: Herre, kven er det?

²⁶Det er han som eg gjev den beten eg no duppar i fatet, svara Jesus. So duppar han beten, og tek og gjev han til Judas Simonsson Iskariot.

²⁷Og då han hadde fenge beten, då for Satan i han. So segjer Jesus til han: Gjer det snart, det du vil gjera!

²⁸Men ingen av dei som sat med til bords, skyna kva han meinte med det han sa til han.

²⁹Sidan det var Judas som hadde pungen, tenkte sume at Jesus vilde segja som so: Kjøp det me treng til høgtidi! eller at han skulde gjeva noko til dei fatige.

³⁰Med det same Judas hadde teke mot beten, gjekk han ut. Det var natt.

³¹Då han var gjengen, segjer Jesus: No er Menneskesonen herleggjord, og Gud er herleggjord i han.

³²Er Gud herleggjord i han, so skal Gud og herleggjera han i seg sjølv, og han skal herleggjera han snart.

³³Berre ei liti stund er eg endå hjå dykk, borni mine. De kjem til å leita etter meg, og som eg sa til jødane: Dit eg gjeng, kann ikkje de koma, so segjer eg no til dykk og.

³⁴Eit nytt bod gjev eg dykk: at de skal elska kvarandre; liksom eg hev elska dykk, so skal de og elska kvarandre.

³⁵På det skal alle skyna at de er mine læresveinar - på det at de hev kjærleik til kvarandre.

³⁶Simon Peter segjer til han: Herre, kvar gjeng du av? Jesus svara: Dit eg gjeng, kann du ikkje fylgja meg no, men du skal fylgja meg sidan.

³⁷Kvi kann eg ikkje fylgja deg straks, Herre? segjer Peter; eg vil gjeva mitt liv for deg!

³⁸Vil du gjeva ditt liv for meg? svara Jesus; det segjer eg deg for visst og sant: Hanen kjem ikkje til å gala fyrr du hev avneitta meg tri gonger.