Read nynorsk 1938 Evangeliet etter Johannes 15 Bible Online

Evangeliet etter Johannes 15 - nynorsk 1938 bible

Evangeliet etter Johannes 15

¹Eg er det sanne vintreet, og Far min er vingardsmannen.

²Kvar grein på meg som ikkje ber frukt, tek han burt, og kvar som ber frukt, reinskar han, so ho skal bera meir frukt.

³De er alt reine for skuld ordet som eg hev tala til dykk.

⁴Ver i meg, so er eg i dykk! Som greini ikkje kann bera frukt av seg sjølv, men berre når ho er på vintreet, so kann ikkje de heller utan de er i meg.

⁵Eg er vintreet, de er greinene. Den som er i meg, og eg i han, han ber mykje frukt; for utan meg kann de ingen ting gjera.

⁶Um nokon ikkje vert verande i meg, vert han kasta ut som ei grein og visnar; folk sankar dei i hop og kastar dei på elden, og dei brenn.

⁷Vert de verande i meg, og vert ordi mine verande i dykk, so bed um kva de vil, og de skal få det!

⁸På den måten vert Far min herleggjord at de ber mykje frukt, og de skal verta mine læresveinar.

⁹Som Faderen hev elska meg, so hev eg elska dykk; ver i min kjærleik!

¹⁰Held de bodi mine, so er de i min kjærleik, liksom eg hev halde bodi åt Far min og er i hans kjærleik.

¹¹Dette hev eg tala til dykk so mi gleda kann verta i dykk, og dykkar gleda kann vera fullkomi.

¹²Det er bodet mitt at de skal elska kvarandre, som eg hev elska dykk.

¹³Ingen hev større kjærleik enn at han gjev livet sitt for venene sine.

¹⁴De er venene mine so sant de gjer det eg segjer til dykk.

¹⁵Eg kallar dykk ikkje tenarar lenger; for tenaren veit ikkje kva herren hans gjer; men dykk kallar eg vener, for alt eg hev høyrt av Far min, hev eg sagt til dykk.

¹⁶De hev ikkje valt ut meg, men eg hev valt ut dykk, og sett dykk til å ganga ut og bera frukt - frukt som varer ved, so Faderen kann gjeva dykk alt de bed um i mitt namn.

¹⁷Det er det eg legg dykk på hjarta at de skal elska kvarandre!

¹⁸Når verdi hatar dykk, so skal de vita at ho hev hata meg fyre dykk.

¹⁹Var de av verdi, so vilde verdi elska sitt eige. Men for di de ikkje er av verdi, men eg hev valt dykk ut or verdi, difor hatar verdi dykk.

²⁰Kom i hug det ordet eg sa dykk: Ein tenar er ikkje større enn herren sin; hev dei forfylgt meg, vil dei forfylgja dykk og; hev dei halde seg etter mitt ord, vil dei halda seg etter dykkar ord og.

²¹Men alt dette kjem dei til å gjera mot dykk for mitt namn skuld, av di dei ikkje kjenner den som sende meg.

²²Var eg ikkje komen og hadde tala til dei, so hadde dei ikkje synd; men no hev dei ingen ting å orsaka syndi si med.

²³Den som hatar meg, hatar Far min og.

²⁴Hadde eg ikkje gjort slike verk ibland dei som ingen annan hev gjort, so hadde dei ikkje synd; men no hev dei set dei, og like vel hatar dei både meg og Far min.

²⁵Men det er av di det laut sannast det ordet som er skrive i lovi deira: Utan orsak hata dei meg.

²⁶Når målsmannen kjem, han som eg skal senda dykk frå Faderen, Sannings-Anden, som gjeng ut frå Faderen, so skal han vitna um meg.

²⁷Men de og skal vitna; for de hev vore med meg frå det fyrste.