Read nynorsk 1938 Evangeliet etter Johannes 16 Bible Online

Evangeliet etter Johannes 16 - nynorsk 1938 bible

Evangeliet etter Johannes 16

¹Dette hev eg tala til dykk so de ikkje skal koma til å styggjast.

²Dei kjem til å støyta dykk ut or synagogone; ja, det kjem ei tid då kvar den som drep dykk, trur at han tener Gud med det;

³og det gjer dei av di dei ikkje kjenner Faderen og ikkje meg heller.

⁴Men dette hev eg tala til dykk, so de, når den tidi kjem, skal koma i hug eg hev sagt dykk det; eg sa det ikkje til dykk frå det fyrste, for då var eg hjå dykk.

⁵Men no gjeng eg til han som hev sendt meg, men ingen av dykk spør meg: Kvar gjeng du av?

⁶men for di eg hev tala dette til dykk, er hjarta dykkar fullt av sorg.

⁷Men eg segjer dykk som sant er: Det er til bate for dykk at eg gjeng burt. For gjeng eg ikkje burt, kjem målsmannen ikkje til dykk; men gjeng eg burt, so skal eg senda han til dykk.

⁸Og når han kjem, skal han yvertyda verdi um synd og um rettferd og um dom:

⁹um synd, av di dei ikkje trur på meg;

¹⁰um rettferd, av di eg gjeng til Faderen, og de ikkje ser meg lenger;

¹¹um dom, av di hovdingen yver denne verdi er dømd.

¹²Endå hev eg mykje å segja dykk, men de kann ikkje bera det no.

¹³Men når han kjem, Sannings-Anden, skal han leida dykk fram til heile sanningi; for han skal ikkje tala av seg sjølv, men alt det han høyrer, skal han tala, og det som skal koma, skal han gjera kunnigt for dykk.

¹⁴Han skal herleggjera meg; for det er av mitt han tek og lærer dykk.

¹⁵Alt det Faderen hev, er mitt; difor sa eg, at han tek av mitt og lærer dykk.

¹⁶Um ei lita stund ser de meg ikkje lenger, og um ei liti stund att skal de få sjå meg.

¹⁷Då sa nokre av læresveinane seg imillom: Kva meiner han med dette som han segjer til oss: Um ei liti stund ser de meg ikkje, og um ei liti stund att skal de få sjå meg, og: Eg gjeng til Faderen?

¹⁸Kva meiner han med det: ei liti stund, sa dei; me skynar ikkje kva han talar um.

¹⁹Jesus skyna at dei vilde spyrja han, og han sa til dei: Er det det de dryfter med kvarandre, at eg sa: Um ei liti stund ser de meg ikkje, og um ei liti stund att skal de få sjå meg?

²⁰Det segjer eg dykk for visst og sant: De skal gråta og øya, men verdi skal gleda seg. De skal syrgja, men sorgi dykkar skal vendast til gleda.

²¹Når ei kona skal eiga barn, er ho sutfull av di timen hennar er komen; men når ho hev fenge barnet, kjem ho ikkje lenger i hug kor vondt ho hev lide, so glad er ho for di eit menneske er født til verdi.

²²Soleis er de og sutfulle no; men eg skal sjå dykk att; då vert de hjarteglade, og ingen tek gleda dykkar frå dykk.

²³Den dagen skal de ikkje spyrja meg um noko. Det segjer eg dykk for visst og sant: Bed de Faderen um noko, so skal han gjeva dykk det i mitt namn.

²⁴Til dessa hev de ikkje bede um noko i mitt namn - bed, so skal de få, so gleda dykkar kann vera fullkomi!

²⁵Dette hev eg tala til dykk i likningar. Det kjem ei tid då eg ikkje skal tala til dykk i likningar lenger, men fortelja dykk ope og endefram um Faderen.

²⁶Den dagen skal de beda i mitt namn, og eg segjer dykk ikkje at eg vil beda Faderen for dykk;

²⁷for Faderen sjølv elskar dykk, for di de hev elska meg og trutt at eg hev gjenge ut frå Gud.

²⁸Eg hev gjenge ut frå Faderen og er komen hit til verdi; no fer eg burt frå verdi att og gjeng til Faderen.

²⁹Læresveinane segjer: Sjå, no talar du endefram og segjer ingi likning.

³⁰No veit me at du veit alt og ikkje treng at nokon spør deg; difor trur me at du er komen frå Gud.

³¹No trur de! svara Jesus;

³²sjå det kjem ei stund - ja, ho er alt komi - då de skal spreidast kvar til sin heim og lata meg vera att åleine. Men eg er ikkje åleine; Faderen er med meg.

³³Dette hev eg tala til dykk, so de skal hava fred i meg. I verdi hev de trengsel; men ver hugheile! eg hev vunne yver verdi.