Read nynorsk 1938 Evangeliet etter Johannes 19 Bible Online

Evangeliet etter Johannes 19 - nynorsk 1938 bible

Evangeliet etter Johannes 19

¹Då tok Pilatus og let dei hudfletta Jesus.

²Og hermennene fletta ein krans av klunger og sette på hovudet hans og kasta ei purpurkåpe um han, og gjekk fram for han og sa:

³Heil deg, jødekonge! og slo til han i andletet.

⁴Pilatus gjekk ut att og sa til dei: Her kjem eg ut til dykk med han, so de skal vita at eg ikkje finn nokor skuld hjå han.

⁵So kom Jesus ut med klungerkransen på og purpurkåpa, og Pilatus segjer til dei: Sjå det mennesket!

⁶Då øvsteprestane og sveinane deira fekk sjå han, skreik dei: Krossfest, krossfest! Pilatus segjer til dei: Tak de og krossfest han! Eg finn ingi skuld hjå han.

⁷Jødane svara: Me hev ei lov; etter den lyt han døy, for di han hev gjort seg sjølv til Guds Son.

⁸Då Pilatus høyrde det ordet, vart han endå reddare;

⁹han gjekk inn att i borgi og spurde Jesus: Kvar er du ifrå? Men Jesus gav han ikkje noko svar.

¹⁰Pilatus segjer til han: Svarar du meg ikkje? Veit du ikkje at eg hev makt til å gjeva deg fri og hev makt til å krossfesta deg?

¹¹Jesus svara: Du hadde ingi makt yver meg, var det ikkje gjeve deg ovantil. Difor hev han større synd den som gav meg yver til deg.

¹²Etter dette vilde Pilatus gjerne gjeva han fri. Men jødane ropa: Gjev du han fri, er du ikkje ven med keisaren. Kvar den som gjer seg sjølv til konge, set seg upp imot keisaren.

¹³Då Pilatus høyrde dei ordi, førde han Jesus ut og sette seg i domarsætet, på den staden dei kallar Tavletilet - på hebraisk heiter det Gabbata -.

¹⁴Det var då fyrebuingsdagen i påskehelgi, og um lag den sette timen. So segjer han til jødane: Sjå her er kongen dykkar!

¹⁵Då ropa dei: Burt, burt med han, burt med han! Krossfest han! - Skal eg krossfesta kongen dykkar? segjer Pilatus. Me hev ingen konge utan keisaren, svara øvsteprestane.

¹⁶Då gav han Jesus yver til dei, so han skulde krossfestast.

¹⁷So tok dei Jesus med seg. Han bar sjølv krossen sin og gjekk ut til Skallestaden dei kallar - på hebraisk heiter det Golgata -.

¹⁸Der feste dei han til krossen, og saman med han tvo andre, ein på kvar sida, og Jesus midt imillom.

¹⁹Pilatus skreiv og ei innskrift og sette på krossen; ho lydde so: Jesus frå Nasaret, kongen yver jødane.

²⁰Den innskrifti las då mange av jødane; for staden der Jesus vart krossfest, var tett utmed byen, og det var skrive på hebraisk og latin og gresk.

²¹Då sa øvsteprestane åt jødane til Pilatus: Skriv ikkje: Kongen yver jødane, men: Han sa: Eg er konge yver jødane!

²²Det eg hev skrive, hev eg skrive, svara Pilatus.

²³Då hermennene hadde fest Jesus til krossen, tok dei klædi hans og skifte i fire luter, ein for kvar hermann. Kjortelen tok dei og. Kjolen var usauma og heilvoven alt ovantil;

²⁴difor sa dei seg imillom: Lat oss ikkje riva han sund, men kasta lut um kven som skal hava han! Soleis skulde Skrifti sannast: Dei skifte klædi mine millom seg, og kasta lut um kjolen min. So gjorde no hermennene.

²⁵Men innmed krossen åt Jesus stod mor hans og morsyster hans, Maria, kona hans Klopas, og Maria Magdalena.

²⁶Og då Jesus såg mor si, og såg at den læresveinen som han elska, stod innmed henne, segjer han til mori: Kvinna, der er son din!

²⁷So segjer han til læresveinen: Der er mor di. Og frå den stundi tok læresveinen henne heim til seg.

²⁸Då visste Jesus at no var alt fullført, so Skrifti skulde sannast, so segjer han: Eg er tyrst.

²⁹Det stod eit kjer der som var fullt av vineddik; av den eddiken fyllte dei ein svamp og sette han på ein isop-stylk og heldt han upp til munnen hans.

³⁰Då Jesus hadde fenge vineddiken, sa han: Det er fullført! og han bøygde hovudet og gav andi si yver til Gud.

³¹Etter di no det var fyrebuingsdagen, og liki ikkje måtte verta hangande på krossen um sabbaten - for den sabbatsdagen var storheilag - so bad jødane Pilatus at beini måtte brjotast sund på dei, og at dei måtte takast ned.

³²Då kom hermennene og braut sund beini både på den fyrste og den andre som hadde vorte krossfeste i hop med han.

³³Då dei kom til Jesus og såg at han alt var slokna, braut dei ikkje hans bein sund;

³⁴men ein av hermennene stakk han i sida med eit spjot, og straks kom det ut blod og vatn.

³⁵Dette vitnar ein som hev set det, og vitnemålet hans er sætande, han veit sjølv at han segjer sant, so de og må tru.

³⁶For dette hende av di Skrifti laut sannast: Det skal ikkje brjotast sund eit bein på han.

³⁷Og eit anna skriftord att lyder so: Dei skal sjå burt på han som dei hev gjenomstunge.

³⁸Sidan kom Josef frå Arimatea, som var ein av læresveinane åt Jesus, men dulde for det, av di han var redd jødane; han bad Pilatus um han måtte få taka lekamen åt Jesus, og Pilatus gav han lov til det. So kom han og henta lekamen hans.

³⁹Nikodemus, han som fyrste gongen var komen til han um natti, kom og, og hadde med seg ei blanding av myrra og aloë, um lag hundrad pund.

⁴⁰So tok dei lekamen åt Jesus og sveipte han i lin med dei angande kryddone imillom, soleis som jødane hev for vis når dei bur ein til likferd.

⁴¹På den staden han vart krossfest, var det ein hage, og i hagen ei ny grav, som det endå aldri hadde vorte sett ned noko i.

⁴²Der la dei då Jesus, av di det var fyrebuingsdagen åt jødane, og gravi var nær innmed.