Read nynorsk 1938 Evangeliet etter Johannes 2 Bible Online

Evangeliet etter Johannes 2 - nynorsk 1938 bible

Evangeliet etter Johannes 2

¹Tridje dagen stod det eit brudlaup i Kana i Galilea. Mor åt Jesus var der,

²og Jesus og læresveinane hans vart og bedne til brudlaupet.

³Då vinen traut, segjer mor åt Jesus til han: Dei hev ikkje vin.

⁴Kva vil du meg, kvinna? svara Jesus; mi tid er ikkje endå komi.

⁵Gjer alt han segjer til dykk! sa mor hans til bordsveinane.

⁶Etter di no jødane hev for vis å två seg fyre måli, stod det der seks vass-kjer av stein; kvart av dei tok tvo eller tri anker.

⁷Fyll kjeri med vatn! segjer Jesus til bordsveinane. Då fyllte dei kjeri heilt uppåt breiddi.

⁸So sa han til dei: Aus no upp og ber det til kjøkemeisteren! Dei so gjorde;

⁹men då kjøkemeisteren hadde smaka på vatnet, som var vorte til vin, og ikkje visste kvar den vinen kom ifrå - men bordsveinane visste det, dei som hadde aust upp vatnet - so ropa han på brudgomen og sa til han:

¹⁰Kvar mann set fyrst fram den gode vinen, og når folk hev vorte drukne, den ringare; du hev gøymt den gode vinen til no!

¹¹Dette fyrste teiknet sitt gjorde Jesus i Kana i Galilea og let sin herlegdom skina fram; og læresveinane hans trudde på han.

¹²Sidan for han ned til Kapernaum med mor si og brørne og læresveinane sine, og der vart dei verande nokre få dagar.

¹³Det leid til påskehelgi åt jødane, og Jesus for upp til Jerusalem.

¹⁴I templet fann han folk som selde uksar og sauer og duvor, og andre som sat og veksla pengar.

¹⁵Då gjorde han seg ei svepa av reip og dreiv dei alle ut or templet, og sauene og uksane med; småpengane åt vekslarane kasta han utyver, og velte bordi deira,

¹⁶og til duvekræmarane sa han: Burt med dette! Gjer ikkje huset åt Far min til ei krambu!

¹⁷Og læresveinane kom i hug at det stend skrive: Brennhug for ditt hus kjem til å eta meg upp.

¹⁸Då tok jødane til ords og sa til han: Kva teikn syner du oss, sidan du gjer dette?

¹⁹Jesus svara: Riv dette templet ned, og eg skal reisa det upp att på tri dagar!

²⁰Då sa dei: I seks og fyrti år hev det vore bygt på dette templet, og du vil reisa det upp att på tri dagar!

²¹Men det var lekams-templet sitt han tala um.

²²Då han no hadde stade upp frå dei daude, kom læresveinane hans i hug at han hadde sagt dette, og dei trudde Skrifti og det ordet Jesus hadde sagt.

²³Medan han var i Jerusalem i påskehelgi, på høgtidi, trudde mange på namnet hans då dei såg dei teikni han gjorde.

²⁴Men sjølv trudde Jesus seg ikkje til dei, av di han kjende alle,

²⁵og ikkje trong at nokon skulde vitna um noko menneske; for han visste sjølv kva som budde i menneskja.