Read nynorsk 1938 Evangeliet etter Johannes 21 Bible Online

Evangeliet etter Johannes 21 - nynorsk 1938 bible

Evangeliet etter Johannes 21

¹Sidan openberra Jesus seg endå ein gong for læresveinane; det var ved Tiberiassjøen, og gjekk soleis til:

²Simon Peter og Tomas - han som me kallar Didymus - og Natanael - han frå Kana i Galilea - og Sebedeus-sønene og tvo andre av læresveinane var der i hop. /[3]

³Då segjer Simon Peter til dei: Eg vil av og fiska. - Me vil og vera med, segjer dei. So tok dei ut og steig i båten; men den natti fekk dei ikkje noko.

⁴I det belet det tok til å dagast, stod Jesus med ein gong på strandi; men læresveinane visste ikkje at det var han.

⁵Jesus sa til dei: De hev vel ikkje noko fisk, born? Nei, svara dei.

⁶Kasta garnet på høgre sida av båten, so fær de fisk, sa han. Dei so gjorde, og då var dei ikkje god til å draga garnet, so mykje fisk var der.

⁷Då segjer den læresveinen som Jesus elska, til Peter: Det er Herren! Med det same Simon Peter fekk høyra at det var Herren, batt han kjolen um seg - for han var naken - og kasta seg i sjøen.

⁸Og dei andre læresveinane kom med båten, og drog garnet med fiskane etter seg; for dei var ikkje langt ifrå land, berre tvo hundrad alner på lag.

⁹Då dei steig i land, ser dei ein glohaug som ligg der med fisk på og brød.

¹⁰Kom hit med noko av den fisken de fekk! segjer Jesus.

¹¹Då steig Simon Peter ut i båten og drog garnet på land; det var fullt av store fiskar, hundrad og tri og femti; men endå det var so mange, gjekk ikkje garnet sund.

¹²Kom hit og et morgonverden! segjer Jesus. Ingen av læresveinane våga å spyrja han: Kven er du? dei visste det var Herren.

¹³Då kom Jesus og tok brødet og gav dei, og like eins fisken.

¹⁴Dette var no tridje gongen Jesus openberra seg for læresveinane etter at han hadde stade upp frå dei daude.

¹⁵Som dei no hadde ete morgonverden, segjer Jesus til Simon Peter: Simon Johannesson, elskar du meg meir enn desse? - Ja, Herre, svarar han; du veit at eg held av deg. - Fød lambi mine! segjer Jesus.

¹⁶So segjer han til han att, andre gongen: Simon Johannesson, elskar du meg? Han svarar: Ja, Herre, du veit eg held av deg. Gjæt sauene mine! segjer Jesus.

¹⁷So segjer han til han tridje gongen: Simon Johannesson, held du av meg? Peter tykte det leidt at han spurde han tridje gongen: Held du av meg? Han svara: Herre, du veit alt, du veit at eg held av deg. Jesus segjer til han: Fød sauene mine!

¹⁸Det segjer eg deg for visst og sant: Då du var yngre, batt du sjølv beltet um deg og gjekk dit du vilde; men når du vert gamal, skal du retta ut hendene dine, og ein annan skal binda beltet um deg og føra deg dit du ikkje vil.

¹⁹Det sa han for å vitra um kva slag daude han skulde koma til å æra Gud med. Då han hadde sagt det, segjer han til han: Fylg meg!

²⁰Då Peter snudde seg, ser han at den læresveinen som Jesus elska, fylgde med, han som hadde sete tett innmed han då dei heldt nattverd, og spurt: Herre, kven er den som svik deg?

²¹Då Peter såg han, segjer han til Jesus: Herre, korleis skal det so ganga han?

²²Jesus svarar: Um eg vil at han skal leva til eg kjem, kva hev so du med det? Fylg du meg!

²³Soleis kom det ordet ut bland brørne: Den læresveinen døyr ikkje. Men Jesus sa ikkje til han at han ikkje skulde døy; det han sa, var: Um eg vil at han skal leva til eg kjem, kva hev so du med det?

²⁴Det er den læresveinen som vitnar um desse ting og hev skrive dette, og me veit at hans vitnemål er sant.

²⁵Det er endå mykje anna som Jesus hev gjort. Skulde det skrivast upp, kvar ting for seg, trur eg ikkje heile verdi kunde røma dei bøkene som då laut skrivast.