Read nynorsk 1938 Evangeliet etter Johannes 9 Bible Online

Evangeliet etter Johannes 9 - nynorsk 1938 bible

Evangeliet etter Johannes 9

¹Då han gjekk frametter, fekk han sjå ein mann som hadde vore blind frå han var fødd.

²Læresveinane spurde han: Rabbi, kven er det som hev synda, han eller foreldri hans, sidan han laut koma til verdi blind?

³Dei hev ikkje synda, korkje han eller foreldri hans, svara Jesus, men det var for di Guds verk skulde syna seg på han.

⁴So lenge det er dag, lyt eg gjera hans verk som hev sendt meg; det kjem ei natt då ingen kann arbeida.

⁵Medan eg er i verdi, er eg ljoset åt verdi.

⁶Med so sagt sputta han på jordi og laga ei gyrma av sputtet; den gyrma smurde han på augo hans

⁷og sa til han: Gakk og två deg i Siloadammen! - Siloa tyder sendemann -. So gjekk han stad og tvo seg, og då han kom att, kunde han sjå.

⁸Då sa grannane og dei som jamleg hadde set han fyrr - for han var ein tiggar: Er ikkje det han som sat og bad seg?

⁹Jau, det er han, sa andre. Endå andre sa: Nei, men han er lik han. Sjølv sa han: Det er eg.

¹⁰Korleis vart augo dine opna? sa dei då.

¹¹Han svara: Den mannen som dei kallar Jesus, laga ei gyrma og smurde på augo mine og sa til meg: Gakk til Siloa og två deg! So gjekk eg stad og tvo meg, og då fekk eg syni mi.

¹²Kvar er han, den mannen? spurde dei. Eg veit ikkje, segjer han.

¹³Dei fører han til farisearane, han som hadde vore blind.

¹⁴Det var på ein sabbat Jesus laga gyrma og opna augo hans.

¹⁵So spurde dei han att, farisearane og, korleis han hadde fenge syni si. Han la ei gyrma på augo mine, svara han; so tvo eg meg, og no ser eg.

¹⁶Då sa nokre av farisearane: Den mannen er ikkje frå Gud, sidan han ikkje held sabbaten. Andre sa: Korleis kann ein syndig mann gjera slike teikn? Og dei var usams um dette.

¹⁷So segjer dei til den blinde att: Kva segjer du um han, sidan det var dine augo han opna? - Han er ein profet, svara han.

¹⁸Då vilde ikkje jødane tru det um han at han hadde vore blind og fenge syni si, fyrr dei hadde henta foreldri åt han som hadde fenge syni si.

¹⁹Dei spurde dei: Er dette son dykkar som de segjer er fødd blind? Korleis hev det seg då at han no ser?

²⁰Me veit at dette er vår son, og at han er fødd blind, svara foreldri hans;

²¹men korleis det hev seg at han no ser, det veit me ikkje, og kven som hev opna augo hans, veit me ikkje heller. Spør han sjølv! Han er gamal nok; han kann sjølv svara for seg.

²²Det sa foreldri hans av di dei var redde jødane; for jødane var alt samrådde um at den som sanna at han var Messias, skulde støytast ut or synagoga;

²³difor var det foreldri hans sa: Han er gamal nok; spør han sjølv!

²⁴So henta dei andre gongen den mannen som hadde vore blind, og sa til han: Gjev Gud æra! Me veit at denne mannen er ein syndar!

²⁵Um han er ein syndar, veit eg ikkje, svara han; eitt veit eg: eg var blind, og no ser eg.

²⁶Kva gjorde han med deg? sa dei då; korleis gjekk det til at han opna augo dine?

²⁷Eg hev alt sagt dykk det, svara han, og de akta ikkje på det; kvi vil de høyra det upp att? Kann henda de og vil verta læresveinane hans?

²⁸Då skjelte dei han ut og sa: Du er hans læresvein, men me er Moses' læresveinar.

²⁹Me veit at Gud hev tala til Moses, men um denne veit me ikkje kvar han er ifrå.

³⁰Då er det underleg at de ikkje veit kvar han er ifrå, svara mannen; han hev då opna mine augo.

³¹Me veit at Gud ikkje høyrer på syndarar; men den som ottast han og gjer etter hans vilje, den høyrer han på.

³²Frå ævords tid hev det ikkje vore spurt at nokon hev opna augo på ein blindfødd.

³³Var ikkje denne mannen komen frå Gud, kunde han ingen ting gjera.

³⁴Då ropa dei imot han: I synder er du fødd og boren, og du vil læra oss! Og dei kasta han ut.

³⁵Jesus fekk høyra at dei hadde kasta han ut, og då han møtte han, sa han til han: Trur du på Guds Son?

³⁶Kven er det då, Herre, so eg kann tru på han? svara han.

³⁷Du hev set han, sa Jesus; det er den som no talar med deg.

³⁸Eg trur, Herre! sa mannen og kasta seg på kne for han.

³⁹Og Jesus sa: Til doms er eg komen til denne verdi, so dei som ikkje ser, skal sjå, og dei som ser, skal verta blinde.

⁴⁰Nokre farisearar som var innmed han, høyrde det og sa: Kann henda me og er blinde?

⁴¹Då sa Jesus: Var de blinde, so hadde de ikkje synd; men no segjer de: Me ser - og syndi dykkar vert verande der ho var.