Read nynorsk 1938 Paulus' brev til romarane 15 Bible Online

Paulus' brev til romarane 15 - nynorsk 1938 bible

Paulus' brev til romarane 15

¹Me som er sterke, skyldar å bera vanstyrken åt dei veike og ikkje vera oss sjølve til hugnad.

²Kvar av oss vere næsten sin til hugnad, til hans gagn, til uppbyggjing!

³For Kristus levde ikkje heller seg sjølv til hugnad, men, som skrive stend: Hædingane frå dei som hædde deg, dei fall på meg.

⁴For alt det som fyrr er skrive, det er skrive til lærdom for oss, so me skal hava von ved det tolmod og den trøyst som skriftene gjev.

⁵Men den Gud som gjev tolmod og trøyst, han gjeve at de må hava eit hjartelag innbyrdes etter Kristi Jesu fyredøme,

⁶so de samhuga, med EIN munn, kann prisa Gud og vår Herre Jesu Kristi Fader!

⁷Difor skal de taka dykk av kvarandre, liksom Kristus og tok seg av dykk til Guds æra.

⁸Eg meiner: Kristus hev vorte ein tenar for dei umskorne for å prova at Gud er sannordig, og stadfesta dei lovnader som federne hev fenge,

⁹men heidningane skal prisa Gud for miskunn, som skrive stend: Difor vil eg prisa deg millom heidningar og lovsyngja ditt namn.

¹⁰Og ein annan stad segjer Skrifti: Gled dykk, heidningar, saman med hans folk!

¹¹Og endå ein stad: Lova Herren, alle heidningar, og prisa han, alle folk!

¹²Og atter ein gong, hjå Esaias: Koma skal Isais rotrenning, han som reiser seg for å råda yver heidningar; på han skal heidningane vona.

¹³Men den Gud som gjev voni, fylle dykk med all gleda og fred i trui dykkar, so de kann vera rike på von ved den Heilage Andes kraft!

¹⁴Eg, mine brør, hev og den visse trui um dykk at de av dykk sjølve er fulle av godleik, fyllte med all kunnskap, duglege til jamvel å påminna kvarandre.

¹⁵Like vel hev eg her og der i brevet skrive heller djervt til dykk for å kveikja upp att minnet dykkar, etter den nåden som Gud hev gjeve meg:

¹⁶at eg skal vera Jesu Kristi offerprest hjå heidningane og gjera prestetenesta med Guds evangelium, so heidningane kann verta eit offer som han hev hugnad i, eit som er helga ved den Heilage Ande.

¹⁷So er det då i Kristus Jesus eg kann rosa meg av mi tenesta for Gud.

¹⁸For eg vil ikkje våga meg til å tala um anna enn det som Kristus hev gjort ved meg til å føra heidningar til lydnad, med ord og gjerning,

¹⁹med krafti av teikn og under, med krafti av Guds Ande, so eg til fulles hev kunngjort Kristi evangelium frå Jerusalem og rundt ikring alt til Illyria,

²⁰men soleis at eg sette mi æra i å ikkje forkynna evangeliet der som Kristus alt var nemnd, so eg ikkje skulde byggja på framand grunnvoll,

²¹men, som skrive stend: Dei som ingen bodskap hev fenge um han, skal sjå, og dei som ikkje hev høyrt, skal skyna.

²²Det er mest dette som hev hindra meg frå å koma til dykk.

²³Men no som eg ikkje lenger hev noko rom i desse landi, og i mange år hev lengta etter å koma til dykk,

²⁴no vonar eg at eg skal få sjå dykk når eg fer til Spania og då kjem innum dykk, og at de vil fylgja meg på vegen dit, når eg fyrst i nokon mun hev note hugnad hjå dykk.

²⁵Men no fer eg til Jerusalem i ei ærend for dei heilage.

²⁶For Makedonia og Akaia hev rådt seg til å gjera ei innsamling for dei fatige millom dei heilage i Jerusalem.

²⁷Den rådi hev dei teke, og dei stend og i skuld til dei; for hev heidningane fenge lut i dei åndelege gåvone deira, so skylder dei og å tena dei med dei timelege.

²⁸Når eg då hev gjort ifrå meg det og lagt denne frukti i hendene deira, vil eg draga av stad til Spania og vitja dykk på vegen,

²⁹og eg veit at når eg kjem til dykk, so skal eg koma med Kristi velsigning i fullt mål.

³⁰Men eg legg dykk på hjarta, brør, for vår Herre Jesu Kristi skuld og for den kjærleik skuld som Anden verkar, at de må strida saman med meg i dykkar bøner for meg til Gud,

³¹so eg må verta berga frå dei vantruande i Judea, og ærendi mi til Jerusalem må tekkjast dei heilage;

³²då skal eg, um Gud so vil, vitja dykk med fagnad og få kveikja meg saman med dykk.

³³Fredsens Gud vere med dykk alle! Amen.