Read nynorsk 1938 Paulus' brev til romarane 3 Bible Online

Paulus' brev til romarane 3 - nynorsk 1938 bible

Paulus' brev til romarane 3

¹Kva fyremun hev då jøden? eller kva gagn er det i umskjeringi?

²Mykje i alle måtar! Fyrst og fremst det at dei hev fenge Guds ord i varveitsla.

³For korleis er det? Um sume var utrue, skulde so deira utruskap gjera Guds truskap um inkje?

⁴Nei, langt ifrå! Lat det standa fast at Gud er sannordig, men kvart menneske ein ljugar, som skrive stend: So du må finnast rettferdig i dine ord og vinna når du fører di sak.

⁵Men um vår urettferd syner Guds rettferd, kva skal me so segja? Er då Gud urettferdig når han let sin vreide råma oss? Eg talar på menneskevis.

⁶Nei, langt ifrå! Korleis kunde Gud då døma verdi?

⁷Ja, men um no Guds sannleik ved mi lygn hev synt seg so rikleg til æra for han sjølv, kvi vert eg so endå dømd som ein syndar?

⁸Og skal me ikkje - som dei spottar oss for, og som sume segjer at me lærer folk - gjera det vonde so det kann koma noko godt utav det? Rettferdig er den domen som råmar slike.

⁹Kva då? Hev me noko framum andre? Nei, slett ikkje. Me hev då fyrr klaga både jødar og grekarar og sagt at dei alle ligg under syndi,

¹⁰so som skrive stend: Det finst ingen rettferdig, ikkje ein einaste;

¹¹det finst ikkje den som er vitug, det finst ingen som søkjer Gud.

¹²Alle er dei avvikne, dei er duglause vortne alle i hop; det finst ikkje nokon som gjer godt, det finst ikkje ein einaste ein.

¹³Ei opi grav er strupen deira; med tunga si gjorde dei svik, ormeeiter er under lippone deira.

¹⁴Munnen deira er full av forbanning og beiskleik.

¹⁵Føtene deira er snøgge når deg gjeld å renna ut blod;

¹⁶øyding og usæla er det kvar dei fer,

¹⁷og freds veg kjenner dei ikkje.

¹⁸Ingen otte for Gud hev dei for augo.

¹⁹Men me veit at alt det lovi segjer, det talar ho til dei som hev lovi, so kvar munn skal tagna og heile verdi verta saka for Gud,

²⁰etter di inkje kjøt vert rettferdiggjort for han med lovgjerningar; for ved lovi kjem ein til å kjenna syndi.

²¹Men no hev ei rettferd frå Gud, ei som lovi og profetane vitnar um, vorte openberra utan lovi -

²²ei rettferd frå Gud ved trui på Jesus Kristus for alle og yver alle som trur. For det finst ingen skilnad;

²³alle hev synda og vantar æra for Gud,

²⁴og dei vert rettferdiggjorde ufortent av hans nåde ved utløysingi i Kristus Jesus.

²⁵Honom synte Gud fram i blodet hans, som ein nådestol ved trui. Soleis vilde han syna si rettferd, av di han i sitt langmod hadde havt tol med dei syndene som fyrr var gjorde -

²⁶han vilde syna si rettferd i den tidi som no er, so han kunde vera rettferdig og gjera den rettferdig som hev trui på Jesus.

²⁷Kvar er so vår ros? Ho er utestengd. Etter kva lov? Lovi um gjerningane? Nei, etter lovi um trui.

²⁸For me held fyre at mennesket vert rettferdiggjort ved trui, utan lovgjerningar.

²⁹Eller er Gud berre Gud for jødane? Er han ikkje Gud for heidningane og? Jau, for heidningane og,

³⁰so visst som Gud er ein, og han rettferdiggjer dei umskorne av trui og dei u-umskorne ved trui.

³¹Gjer me då lovi um inkje med trui? Nei, langt ifrå! Me stadfester lovi.