Read nynorsk 1938 Paulus' brev til romarane 7 Bible Online

Paulus' brev til romarane 7 - nynorsk 1938 bible

Paulus' brev til romarane 7

¹Eller veit de ikkje, brør - for eg talar til folk som kjenner lovi - at lovi råder yver mennesket for so lang tid som det lever?

²Soleis er ei gift kvinna ved lovi bundi til mannen sin so lenge han lever; men døyr mannen, er ho løyst frå lovi som batt henne til mannen.

³Difor skal ho kallast horkona i fall ho gifter seg med ein annan mann medan mannen hennar lever; men døyr mannen, so er ho fri frå lovi, so ho ikkje vert nokor horkona um ho vert gift med ein annan mann.

⁴Soleis, mine brør, døydde de og frå lovi ved Kristi lekam, av di de skulde høyra ein annan til - han som stod upp frå dei daude, so me kann bera frukt for Gud.

⁵For då me var i kjøtet, verka dei syndige lystene, som vart vekte ved lovi, soleis i lemene våre at me bar frukt for dauden;

⁶men no er me løyste frå lovi - me hev døytt frå det som heldt oss bundne, so me tener på ny vis: etter Anden, ikkje på gamal vis: etter bokstaven.

⁷Kva skal me då segja? Er lovi synd? Nei, langt ifrå! men eg kjende ikkje syndi utan gjenom lovi; for eg hadde ikkje visst um lysti, hadde ikkje lovi sagt: Du skal ikkje lysta!

⁸Men syndi nytta bodet til å verka allslags lyst i meg; for utan lov er syndi daud.

⁹Eg levde ei tid utan lov; men då bodet kom, livna syndi upp,

¹⁰men eg døydde; og bodet, som skulde vera til liv, det røyndest å vera meg til daude;

¹¹for syndi nytta bodet til å dåra meg, og drap meg med det.

¹²So er då lovi heilag, og bodet heilagt og rettvist og godt.

¹³Hev då det som er godt, vorte meg til daude? Nei, langt ifrå! Det var syndi, for di ho skulde syna seg å vera synd, med di ho volde meg dauden med det som er godt - for di syndi skulde verta ovleg syndig ved bodet.

¹⁴For me veit at lovi er åndeleg; men eg er kjøtleg, seld under syndi;

¹⁵for det eg gjer, skynar eg ikkje; for eg gjer ikkje det som eg vil, men det som eg hatar, det gjer eg.

¹⁶Men gjer eg det som eg ikkje vil, so sannar eg med lovi at ho er god;

¹⁷men no er det ikkje lenger eg som gjer det, men syndi, som bur i meg.

¹⁸For eg veit at i meg, det vil segja i kjøtet mitt, bur inkje godt; viljen hev eg, men gjera det gode vinn eg ikkje;

¹⁹for eg gjer ikkje det gode som eg vil, men det vonde som eg ikkje vil, det gjer eg.

²⁰Men gjer eg det som eg ikkje vil, so er det ikkje lenger eg som gjer det, men syndi, som bur i meg.

²¹So finn eg då den lovi for meg, eg som vil gjera det gode, at det vonde ligg meg for handi.

²²For eg hev mi gleda i Guds lov etter mitt indre menneske,

²³men i lemene mine ser eg ei onnor lov, som strider mot lovi i hugen min og gjer meg til ein fange under syndelovi, den som er i lemene mine.

²⁴Eg arme menneske! kven skal fria meg frå denne daudens lekam?

²⁵Gud vere takk ved Jesus Kristus, vår Herre! - So tener då eg, slik som eg er i meg sjølv, Guds lov med hugen, men syndelovi med kjøtet.