Read nynorsk 1938 Paulus' fyrste brev til korintarane 16 Bible Online

Paulus' fyrste brev til korintarane 16 - nynorsk 1938 bible

Paulus' fyrste brev til korintarane 16

¹Men vedkomande innsamlingi til dei heilage, so skal de fara åt soleis som eg hev skipa det for kyrkjelydane i Galatia!

²På den fyrste dagen i vika leggje kvar av dykk til sida heime hjå seg sjølv det han fær lukka til, so innsamlingi ikkje skal verta gjord fyrst då når eg kjem.

³Når eg so kjem, skal eg senda dei som de vil velja til det, med brev, so dei kann føra kjærleiksgåva dykkar til Jerusalem.

⁴Men er det verdt at eg og reiser, so kann dei reisa saman med meg.

⁵Eg kjem til dykk når eg hev fare gjenom Makedonia; for Makedonia fer eg igjenom;

⁶men hjå dykk kann henda eg drygjer ei tid, eller jamvel vinteren yver, so de kann fylgja meg på vegen dit som eg sidan reiser.

⁷Eg vil ikkje vitja dykk no på vegen; for eg hev ei von um å få drygja ei tid hjå dykk, um Herren gjev lov til det.

⁸I Efesus drygjer eg til kvitsunnhelgi;

⁹for ei stor og verksam dør er upplati for meg, og det er mange motstandarar.

¹⁰Når Timoteus kjem, so sjå til at han kann vera hjå dykk utan otte! for han gjer Herrens gjerning, liksom eg;

¹¹difor må ingen vanvyrda han. Og fylg han på vegen i fred, so han kann koma til meg! for eg ventar på han med brørne.

¹²Vedkomande broren Apollos, so bad eg han mykje at han måtte fara til dykk med brørne; han var slett ikkje viljug til å koma no, men han vil koma når han fær tid.

¹³Vak, statt støde i trui, ver mannelege, ver sterke!

¹⁴Lat alt hjå dykk ganga fyre seg i kjærleik!

¹⁵Eg legg dykk på hjarta, brør: de kjenner huslyden åt Stefanas, at dei er fyrstegrøda av Akaia, og at dei hev rådt seg til å tena dei heilage -

¹⁶so vis de og vyrdnad mot dei, og like eins mot alle som hjelper til og gjer seg umak!

¹⁷Eg gleder meg yver at Stefanas og Fortunatus og Akaikus er her; for saknaden av dykk hev dei avhjelpt.

¹⁸For dei hev kveikt mi og dykkar ånd. Skyna difor på slike!

¹⁹Kyrkjelydane i Asia helsar dykk. Akvilas og Priska helsar dykk mykje i Herren saman med kyrkjelyden i huset deira.

²⁰Alle brørne helsar dykk. Helsa kvarandre med ein heilag kyss!

²¹Helsing med mi, Paulus', hand:

²²Um nokon ikkje elskar Herren, han vere bannstøytt! Maran ata.

²³Herren Jesu nåde vere med dykk!

²⁴Min kjærleik er med dykk alle i Kristus Jesus.